1 + 1 = 3 - Geburt vu üsem Engeli

[Shirley]

De Geburtsbricht hend mis Mami und min Papi zäma verfasst, damits aber nid verwirrend isch, wird als Ich-Form vum Mami us gschriba.. Viel Spass!!



Klini Vorgschicht...


Ich muass ushola, und zwor bis zum eigentliche Geburtstermin, am 20. Februar 2006. Miar sind no ins Spitol zur Kontrolle, döt isch alles i.O. gsi. D'Herztön sind guat gsi, d'Fruchtwassermenge isch guat gsi und s'CTG het nid annähernd ei Wehe azeigt. So sind miar also wider hei, im Wüssa, s'got üsem Engeli guat und es kann in einer Stund oder erst in as paar Täg losgoh…
Am Schmutziga Donnstig, han ich den de ganz Tag so a mulmigs Gfühl kah. Am Fritig Mittag, han ich den festgstellt, dass ich schu länger s'Engeli nümm dütlich gspürt han. Miar händ mit allna möglicha Varianta versuacht, s'Engeli z'wecke… manchmol han ichs den ganz fiin gspürt. Aber einfach komisch. So hend miar ins Spitol aglütet und dia hend üs grad ufbota. Also sind miar namol zur Kontrolle. CTG wieder tiptop, Herztön ok, kei Wehe. D'Ärztin het den aber uf zmol gfunda, s'hegi kli knapp Fruchtwasser, aber usreichend. Si luagi das mim Oberarzt a und allafalls müassti ma den Ileite. Miar isch s'Kinn nur so abagsackt, han ich doch immer gseit, ich will nid Ileite, do ich panischi Angst drvor han. Dr Oberarzt isch den ko und het gseit, Fruchtwasser isch würklich knapp, aber as langt no as paar Täg, ohni dass es üsem Engeli schadet, miar müassend einfach strenger an Kontrolle koh. Miar hend das Angebot dankbar agno und grad für a Sunntig morga wieder abgmacht.
Am Samstig het sich üsers Engeli zwor gmolda, aber i han trotzdem a unguats Gfühl kah. Miar händ üs dr ganzi Tag nur Sorga gmacht und am Obig gmeinsam entschida, dass miar am Sunntig im Spitol ileite lönd. In dem Moment isch es kei schwirigi Entscheidig mehr gsi, will d'Angst und s'Gfühl, dass üsem Engeli nid guat goht het d'Angst um a igleiteti Geburt um einiges überschritta. So sind miar ins Spitol. D'Hebamme het üs bestätigt, dass si au findi, ileite loh, wenn miar so stark s'Gfühl hend. Dr Oberarzt isch ko und het wieder gfunda, s'Fruchtwasser isch namol kli zrugg, aber as wür no reiche zur Versorgig, aber au er unterstützi das voll, wenn miar ileite loh wend.




Und d'Party fangt a...



So hend miar üs am Sunntig, am 26. Februar 2006 drzua entschida, üserm Engeli dr Astoss z'geh, doch zu üs zcho. Do dr Muatermund nid a biz offa gsi isch, hends üs druf vorbereitet, dass es länger goh könnt. Si hend z'erst amol um 12.30 a Tablette zum Muatermund igführt, wo Wehe uslösa sötti. Falls sich in 6 Stund kei Geburtsbeginn abzeichni, werdi ma um 18.30 a 2. Tablette ifüahra… Und das sigi durchus möglich. Jetzt hend miar gwüsst, dass miar nümm heigoh werdend ohni dass üsers Engeli endlich in üserna Arma liggt. Das isch as speziells Gfühl gsi. Miar hend üs Ziit afo vertriba mit pläuderla, philosophiere, lese und dr Cafeteria.


Am 17.45 hend miar müassa im Gebärsaal retour si, do denn dr z'Nacht brocht worda isch und si mi um 18.00 hend wieder ans CTG ahänga wella. Denn han ich afo essa und dauernd Ruggaweh kah. I han immer wieder ufstoh müassa, und gar nüd isch gsi mit in Ruah essa. Rasch hend miar begriffa, dass dia Schmerza im Minutatakt kömmend, und somit realisiert, dass das jetzt wohl dr Geburtsbeginn isch!!


So hend miar grad d'Hebamme gruafa, si het den grad as CTG gmacht. Tatsächlich, mini Wehekurve isch nüm flach gsi, sondern het ganz klar schön Wehe azeigt. Jedi Minuta. Und jedi Minute kli schmerzhafter, aber eidütig zum ushalta! Miar hend no Witz grissa und hend no glachet. Um 20.00 isch den dr Muatermund ca 1 cm offa gsi. Um 21.00 hends mich gfrogt ob ich in d'Badwanna welli. Mmhhmm, Badwanna tönt immer guat, ich bin miar aber durchus bewusst gsi, dass das in der Regel d'Wehe verstärt, dass den intensiver aber au „bruchbarer" werdend. In der Badwanna sind's den au würklich heftiger worda. Aber au do hend miar no glachet und Witz grissa. Miar hend jedi Wehe verabschiedet und jedi neu willkomme gheissa. Jedi erledigti Wehe het üs nöcher zu üserm Engeli brocht. S'isch au Ziit gsi, wo ich nid nur no han könna dia Wehe wegatma sondern dia Wehe zum Teil han müassa wegschreie. Um 22.00 han ich wella zur Badwanna usa und ich han gmerkt, dass mini persönlichi Grenze langsam erreicht isch.



So gebend miar endlich die PDA!!!!!!!

I han zur Sicherheit, will ich gwüsst han dass es einigi Ziit duret, agfrogt ab wenn ma a PDA macha kann. Dia hends miar zu dem Ziitpunkt aber no zimlich usgredet. Am 22.35 hets den a „Knall" geh und s'Fruchtwasser isch abganga. I han denn nid locker loh und schu bald isch d'Assistenzärztin neb miar gsi wo mich zwüsched da Wehe het versuacht über d'Risika und Nebewürkiga vunera PDA z'informiera. Doch mittedrin, het si wegmüassa zunera Geburt. Min Wunsch drnoch isch aber ziemlich luut worda, so dass d'Hebamme selber dr Anästhesist aglütet het. De isch den bald do gsi und het miar dia PDA gleit. Dauernd händs gseit, s'wird jetzt den grad weh tua, aber in dena Wehe dina isch sona PDA an Klacks und überhaupt nid schmerzhaft. Ziemlich gnau um Mitternacht, han ich den endlich ufatma könna. PDA het gwirkt. Ma het mich druf vorbereitet, dass dia nur ca. 2 h wirka wird und ma den nochasprütza muass, sötti ich öppis merka, müasti mi gnuag früah melda, denn wenns nochasprützend goht das ca. 15 min bis wieder wirkt. Gegda Schluss vu der Geburt, d.h. für Presswehe muass dia PDA aber wieder ufglöst werda, so dass ma dr Schmerz wieder gspüri und wieder richtig mitschaffa kann.


Um 00.30 sind mini Wehe schu wieder ziemlich dütlich gsi, i hetti mi aber no nid getraut zum öppis säga... min Schatz het do aber andersch denkt und d'Hebamme grad informiert. Am 01.00 het si den s'ersti mol nochagsprützt, s'het aber nid gwirkt. Innerhalb vom 01.00 bis am 02.00 het si 4 mol nochagsprützt, aber s'het nia gwirkt. Am 01.00 het si den au no dr Muatermund kontrolliert, er isch ca. 3-4 cm offa gsi und 10 cm müand si damit er als offa giltet. S'Köpfli isch au no ziemlich wiit oba gsi. Am 02.00 isch er bereits 6 cm offa gsi und s'Köpfli schu ziemlich wiit una. Am 02.50 isch er sogar schu ganz offa gsi.



Pressa, pressa, pressa... für mi a Erholig...

Ab em 03.00 han ich den schu ziemlich stark dr Drang kah zum Pressa und d'Hebamme und d'Ärztin hend das unterstützt. I han bi jeder Wehe presst und presst und presst. As isch a tolls Gfühl gsi, endlich aktiv öppis z'macha könna und jedes mol wenn ich pressa han dörfa han ich am Schmerz entgegewirka könna, für mi isch das eidütig dia einfachsti Ziit gsi. Schu bald het min Schatz könna vu una s'Köpfli gseh. I han presst und presst und gar nid gmerkt wia Ziit vergoht. Irgendwenn hend d'Hebamme und d'Ärztin gfunda, si müassend dr Oberarzt informiara, will d'Herztöne vu üserm klina Engeli dauernd tüüf sigi. Zu dem Ziitpunkt bin ich bereits über a Stund in da Presswehe glega. Si hend mich denn informiert, dass es vermuatlich a Suugglockageburt si wird. Miar hend Angst kah um üsers Baby und au i bin am Aschlag gsi, so dass ich nur gfrogt han: „wia gschnell isch de Arzt do"? S'isch denn schnell ganga!! Um 04.10 isch dr Oberarzt do gsi und het alles grüstet. Dr Schnitt isch gmacht worda, er het üs guat zuagredet, d'Suugglocka agsetzt und üserm Engeli uf d'Welt gholfa.






Endli, miar 3 händs gschafft... und was hets echt geh?


Am 27. Februar 2006, um 04.36 han ich uf z'mol üsers Engeli uf miar gspürt. Han ich vorher stundalang „o Gott" vor Schmerza gschraua, so han ich jetzt „o Gott" us luuter Liabi, Dankbarkeit, Stolz, Freud und Unglaubwürdikeit gruafa. Üsers Engeli het sich soo warm agfühlt und so schön schwer uf minem Buch. Miar zwei hend den das Glück afo gnüssa, üs gegasitig z'danka und einfach glücklich zsi. Uf zmol han ich denkt, isches jetzt as Meiteli oder as Büabli? Dia ganz Schwangerschaft dura, han ich nia gseit was ich vermuata, aber mis Gfühl het miar zwei, dreimol gseit miar kriagend as Büabli. So han ich versuacht a Blick zwüsched Beili vu üserm Engeli z'erhascha und luag do, eidütig a Büabli. So han ich luut zum Schatz gseit, „jetzt händ miar üsers Büabli" und er het nur gnickt, ohni nochazluaga. D'Hebamme het nur gfunda.. „was as Büabli? S'isch a Meiteli" Miar sind beidi überrascht gsi und hend üs gnauer überzüga wella.. Jaja dia Nabelschnuar het mich drigleit! Und miar hend nur glachet. Miar händ üs so gfreut, dass es as Meiteli isch. Am Obed vor dr Geburt han ich no denkt, naja as Meiteli wer halt schu au schön… Uf d'Frog wia üssers Glück den jetzt heisst: „Amy, Amy Serena!"




...fertig? nei, unerwarteti Komplikationa...


Irgendwenn han ich gmerkt, dass öppis nid so ganz lauft wias sötti. Ich han min Schatz druf ufmerksam gmacht. Ziemlich gschnell isch miar aber klar gsi, dass es sich um Nochgeburt, also Plazenta handla muass. Plazenta sötti sich innerhalb vu einera Stund noch dr Geburt vu selber lösa und muass au no gebora werda. In der Regel passiert das ziemlich schnell noch dr Geburt. Naja, mini Plazenta het do anders vorkah… D'Ärzt hend sich entschida, zum vorsorglich dr Anästhesist hola zloh, dass falls nötig, d'Betäubig sofort gmacht werda kann zum Plazenta vu Hand usazhola. Nebst 2 Hebamme, anera Assistenzärztin, am Oberarzt isch jetzt no dr Anästhesist mit sinera Assistentin ko. Ufzmol het ma minem Schatz d'Amy in d'Hand drückt und vum Geburtszimmer verbandt. I bin erlichtert gsi, denn ich weiss, dass das für ihn a schlimma Ablick gsi wäri. Dia ganz Geburt dura het er mi mega unterstützt, so dass ich säga kann, ich hetti das ohni ihn nia gschafft. Aber in dera Situation isch er machtlos gsi. So bin ich denn allei gsi. In dem Moment han ich all mina Emotiona freia lauf loh. Miar sind Träna nur so abagrunna. Dia sind den grad azrenna koh, ob ich Schmerza han, ich han aber nu glachet und gfunda, nei absolut nid. I bin einfach voller Dankbarkeit und Stolz. Min ganz Körper het zittert und gschüttelt, anschinend vur Astrengig. I han selber gmerkt, wia sogar d'Spitolbett gwacklet het, aber es isch miar ziemlich egal gsi. Um dia Ziit irgendwia überbrücka, han ich agfanga summa, und ziemlich schnell gmerkt, dass dia sich Blick zuawörfend ob echt alles o.k. isch. Noch mehrmoligem Drucka ufem Buch, d'Zuagäng für d'Schmerzmittel für z'hola vur Plazenta schu gleit und am Hiwiis dass nögstens dia Plazenta holend, het Plazenta miar doch no dr Gfalla gmacht und isch um 05.28 vu selber ko. Kurz druf aba, händs agfanga dr Schnitt näha und um 06.25 han ich bereits z'ersta Mol üsri Amy agsetzt zum stilla.




Klini Nochgschicht!


In dera Ziit wird einem au bewusst, was dia eigena Eltra mit üs duragmacht händ, wia si Freud und Leid kah händ. Ma gseht denn grad einiges us ama andera Blickwinkel.


Während der Geburt selber händ miar ca. 3 Schichtwechsel vu da Hebamme mitgmacht und mehrere Ärzt gseh. Nocher im Wuchabett, han ich so viel Schwöstera und wieder Ärzt gseh und miar könnt würklich säga, as isch a genials Team im Spitol!! Miar sind dankbar, dass das aso klappt het.


Vor allem ich bin voller Dankbarkeit an min Schatz, üsri Familia und an üsri Bekannta wo miar in dera Ziit sehr gholfa hend. Ich weiss, dass ich vor allem min Schatz und üsri Familia in dr nögsta Ziit arg beasprucha werda und ich möchti ina jetzt schu DANKA säga! So weiss ich, dass ich in der ersta Ziit jetzt dahai nid kocha, ikaufa oder putza muass, sondern dass das alles erledigt wird und ich mich voll uf d'Amy konzentriera kann.

[Shirley]

[Patrizia]

jööö Shirley, du hesch jo ou eine mitgmacht. Hesch ganz rächt gha hesch uf die PDA bestande. Ha wärend em läse grad a die Ziit müesse zrüggdänke wo mir zwe bed übertreit hei und täglich im Forum üses Leid klagt hei und üs muet gmacht hei zum wiitermache. Isch e schwirigi Ziit gsi för üs bedi gäll. Ganz schön hesch dä Bricht gschribe, isch unheimlich bewegend.
En dicke Drücker, Patrizia

[Morgana]

Ganz herzliche Gratulation zu eurem Jungen! Ist doch schön, wenn man erst nach der Geburt weiss, welches Geschlecht das Kleine hat...

[Shirley]

@Patrizia: Jo ich mag mich auno sehr guat an dia Ziit erinnera. Und wia ich vum Spitol us mit diar glitta han, wills immer dr Termin verschoba han. Jetzt hend miar aber üsri Schätzlis und das zählt!!

@Morgana: Danke für die Gratulation, es ist aber ein Mädchen und kein Junge Aber du hast recht, wir werden uns auch beim nächsten Mal wieder überraschen lassen!!

[soundgarden]

...wow, tolles gewicht.....

[Shirley]

@soundgarden!! danke schön viiiiieeeeeel gewicht aber das war nicht schlimm, nach dem Schnitt habe ich das gar nicht mehr mitbekommen...

[Shirley]

ach mädels.. jetzt sitz ich hier und habe die ganze Geburt nochmals Revue passieren lassen. Vor einem Jahr, um ca diese Zeit (18.00) haben die Wehen im Minutentakt eingesetzt.

Es war streng, aber doch auch das schönste was ich je erlebt habe. Der Moment, als ich unsere Tochter auf den Bauch gelegt bekommen habe, unbeschreibbar! Es hat sich einfach wirklich alles gelohnt!! Ich spüre noch heute ihr Gewicht auf meinem Bauch, und ihre Wärme wenn ich mich an den Moment zurück erinnere.

Ich hoffe, dieses Gefühl irgendwann wieder erleben zu dürfen und wünsche euch allen einen schönen Abend

[laserin]

Liebi Amy

Ich gratuliere dir zu dim hütige Geburtstag. Wünsche dir aues guete.

LG
Laserin

[Shirley]

@Laserin

Ich danke dir für die Glückwünsche, das hat mich echt gefreut!!

Alles Liebe

[Shiggy]

Hey bella,

hans jetzt endtlich gschafft diina Geburtsbricht z'lesa... jaja, du hesch recht, es git no as paar parallela zwüschet eusi geburtana
aber jetzt isch ja d'ziit verbii und d'wundana sind ghailt... hoffa bi diar au?!

Mega küssli vo miar und Giulia an diar und Amy
smak smak smak
ciao belle, und bis bald!

[Maeva]

hey shirley, tolla bricht, han na erst hüt entdeckt. bi wem (hebam) häsh denn du gebora? finds au uuuh schön, wenn ma erst nach dr geburt entdeckt, was es git...

bi üs isch's umgekehrt gsi:min maa hät gsait:"lueg es isch wieder an buab" und ich zu ihm:"nei nei, es isch doch nu d'nabelschnuar.... oder nit?"
...
s'isch denn würkli nit nur d'nabelschnuar gsi zwüsched d'beili und so hämmir jez zwei buaba gschenkt kriegt...

a liabs grüassli us malix

[keylana]

Wunderschön, Shirley!
Und toll geschrieben mit den Titeln....

Lieber Gruss
keylana