Obwohls mir schue wieder ewig vorchunnt, sind nuch keini 2 Wuechä vergangä, wo mir
üsers 2. Chind, dr Robin Ben, händ dörfä begrüssä!
Am Sunntig, 24. Aug. 2008 sind mir z'Fuss bi schönstem Wetter, zämä mit üserer Tochter
Eileen und am Schwager/Schwägerin mit Tochter Sara vo Sarnen nach Alpnach unterwegs
gsi. Es isch richtig warm wordä, ds Picknick am Wichelsee isch gmüetlich gsi und dr
aaschlüüsendi Kuchä bi dr Schwägerin isch fein gsi. Mir isch äs dr ganzi Tag prächtig gangä,
au wenn ich am Abig doch zum Maa gseit ha:"Ja, jetzt gmerk ich mini Bein also schue äs bitzeli!"
Bin immerhin 1 Wuechä vor ET gsi!
Nach ämä feine Fisch-Znacht sind mir gmüetlich nuch uf äm Balkon g'sessä, wo'n ich um die halbi
9i langsam gmerkt han, dass äs Zieh im Buuch aafaht. Z'erst han ich mim Maa gegenüber gar nüüd gseit.
Nach öppä ärä Stund han ich ihnä doch betä, er söll doch mal d'Abständ uf dr Uhr kontrollierä: ä
regelmässigä 10min-Rhythmus!
Ich bin nuch nüüd würggli nervös wordä, ha mich dä abär am halbi 11i doch für äs Bad entschiedä.
Da hätt sich dä gli uusägstellt, dass äs kei falschä Alarm isch: mir sind zum änä guetä 7min-Rhythmus
chue. Nuch i dr Wanne han ich mit dr Frauäklinik telefoniert, da ich gwüsst ha, dass ich mind. 4 Std.
vor Geburt sött dett sii fürs Antibiotika gegä d'Streptokokken. Sie hätt dänn ruhig gmeint, ich sölli
alläs für üseri Tochter organisierä und uf Mitternacht i d'Klinik chue. Das händ mir dänn au gmacht,
sprich d'Schwiegermutter uufbottä. Sie isch am guet halbi 12i bi üüs iitroffä und isch glaub nervöser
gsi als ich und minä Maa
! Zu dem Zytpunkt han ich also schue ä fliisigä 4min-Rhythmus ghaund han au schue müessä mitschnuufä. Erstuunlicherwiis sind mir beidi uf dr Fahrt is Spital total
ruhig gsi, vo Hektik kei Spur.
Kurz nach Mitternacht sind mir iitroffä und händ nüüd schlecht g'stuunät, wo die gliichi Hebamme
wie bi dr 1. Geburt a dr Türe staht....das isch ja äs guets Omen!
D'Herztön händ dänn guet aazeiget, mini Wehe au und dr Muttermund isch schue uf 4cm offä gsi!
Ich han dä im Gebärzimmer kei grossi Gümp meh gmacht, d'Wehen sind mittlerwiilä fast ohni Pausä
chue und händ au zünftig i Ruckä gstrahlät. Drum han ich dä doch nuch uf ä Gymnastikballä gwechslet,
wo mir minä Maa superguet hätt könnä Gegendruck geh.
D'Hebamme hätt üüs dänn informiert, dass üsers Würmli äs bitzeli im Stress isch, dh sini Herztön
bi dä Wehe immer so äs bitzeli i Keller sacket. Das abär suscht im Eilzugstempo vorwärts gangä isch,
hätt mä nüüd müessä iigriifä. Wo mir d'Hebamme dänn am guet halbi 2 seit, ich sötti wieder ufs Bett
wechslä, han ich z'erst gar nüüd verstandä, dass mir üüs schue im Schlussspurt befindet! Kuum bin ich
uf äm Bett gsi, han ich ghört sägä:"So, bi dr nächste Wehe tüüf iischnuufä und pressä"! WAS? Ich bin
doch erst ä gueti Stund da? Aber wahrhaftig: mit dr 2. Presswehe isch dr Kopf durrä gsi und mit dr
nächste Presswehe isch au dr restlich Körper, inkl. ämä luutä Schrei, chue! D'Uhr hätt 01.49 Uhr aazeigt!
Üsers Glücksgfühl isch unbeschriiblich gsi und das chliinä Möckli uf mim Buuch z'spürä hätt für alli
Schmerzä entschädigt! Mir 3 händ üseri erstä gmeinsamä Minute richtig könnä gnüessä und händ
erst wo üüs d'Hebamme fraget, wie ds Bébé dänn söll heissä, überhaupt g'luegät, öb üsers Würmli
äs Schnäbi hätt oder nüüd?
Äs hätt eis gha....und mir händ üüs am Gebärbett für ä Name Robin Ben entschiedä (mir händ zu dem
Zytpunkt immer nuch 5 Meitli- und 5 Buebä-Nämä gha...so ä Eigenart vo üüs: mir findet, mä muess
das Baby z'erst gseh, bevor mä ihm ä Name kann geh!). Er isch 3330g schwer und 49cm lang gsi....
ufs Gramm gliich schwer wie 2 Jahr vorher sini grossi Schwöster Eileen!
Mir sind glücklich und unendlich dankbar, isch alläs so guet verloffä und dörfet mir jetzt als
Kleeblatt-Familiä i Zukunft luegä!
