I han ganz e tolli 2. Schwangerschaft ka und hans einfach könne gnüsse... dä ET (24.8.09) isch nöcher und nöcher ko und bi üs hät sich überhaupt nüd tua... mier hend ein schöna Summertag am andera ida Badi chönna gnüssa... am 23. Auguscht hani no min eigeta Geburi dörfa fiiira.. min GG hät a wichtigi Schualig in Züri ka und i han üsem Insiderli guet zuagredet, dass es no schöö söll dina bliiba... Han so dä Tag bi mim Mami gnüssa könna und bin rundum verwöhnt worda...
Mier sind am Obig ins Bett, mit em Gedanka, dass mer am negschta Tag am 8ti wohl müand zur Kontrolla aatraba... 
Am 5i bin ich aber serschti mol verwachet mit ma ganz liachta Zücha.. bi mol ufs WC und nahera wieder ins BEtt.. han gaar kei Luscht ka zum scho ufschtoo.. bin no viel zmüad gsii..
am 6i bini dänn aber doch wieder verwachet und han all 7 Minuta a Weha ka.. nid schlimm und no sehr guet zum ushalta aber doch so, dasis gspührt han... natürli hät mi de Fynn ghört umanuscha und isch verwachet.. 
Hanem dänn en Schoppa i sim Bett id Händ druckt und gseit er söll dä trinka und danoch nomol schlofa... was er zum Glück gmacht hät... 
Den hani min GG probiert zwecka und hanem gseit, dass es glaubs los gäng... Dia 1. Geburt isch jo so rasant gsii, dasi nid han wella zlang warta... sini Antwort isch gsii... jojooooo.. und er hät sich uf dia ander Siita treit und wiiterpfuuset... do hani mol dä Hebamme aglüüte und dia het gmaint mier söllet sobald wia mögli ko... dänn sGotti vom Grossa organisiert... und dänn.. nomol zu mim GG.... *gröhl* (i mua jetzt au wieder lacha weni dra denka!!! 
) I han ihm a ultimativi Hammer-Weha vorgspielt und iar hetet ihn sölla gseh... i han ihn no nia so gschnäll zum Bett usako gseh wia döta... Im nochhinein bini froh gsi, hanen nomol schlofa lo.. well er isch noher ein Nerv gsii und sooo nervös... Mier sind dänn am 7.30 Uhr im Spitol ako... dWeha sind immerno all 5-7 Minuta ko und sehr guet zum ushalta gsii... äs isch ganz a tolli Hebamme uma gsii plus no a Lern-Hebamme (seit ma dem so?!)... isch würkli a schöni, lockeri Atmosphära gsii.. sie händ mi denn as CTG tua... alles tiptop gsii mit üsem Insiderli und dWeha sind au schö bliiba... si hät mi denn gschwind mol untersuacht und wow... 8cm bereits offa... ohni grossi schlimmi Weha!
*freeeeu* Do sind dänn gat dÄrzt zu da Visita ko und händ gmaint, eina käm demfal scho glii wieder... dHebamme hät den gfrooget obi id Badwanna well... mier hät fängs vor luuter ligga ida Nacht und danoch uf däm Bett, alles weh tua... hey isch da herrlich gsii... wahnsinn.. mini Schmärza sind gat wäg gsii... do i dänn gat au ganz offa gsii bin händs mier dFruchtblosa inra Weha göffnat... läääck, do isch grad en grossa Druck wäg gsii.. und a hufa Wasser meh ida Wanna... und dänn sind au gat schlagartig dPressweha do gsi.. vo 0 uf 100... i weiss nid wiaviel Pressweha i ka han.. ned da huufa... und dänn plötzli hät sCTG agfanga piipsa... en rota Knopf hät glüüchtet und dHebamma sind nervös worda... händ min GG gschickt go lüüüta und zu mier händs gseit, jetzt müass sBaby ufd Wält ko.. eimol prässa und alles ge... was i zum Glück härabrocht han und so isch dSVEA am 8.59 Uhr nach nur 1 1/2 Stund ufd Wält ko... den aber dä Schock... blass...ganz wiiis... kein Schrei vo üsem Müüsli... sie händ sofort dNabelschnuar duragschnitta und wäg sinds mit ira gsii... a huufa Lüüt sind is Gebärzimmer ko und händ sich um dSvea kümmeret... denn endlich... ganz liislig... a klina Schrei... es bitzali es knorza.. I bin dänn sofort zur Badwanna usa und bi wieder ufs Bett gläga... gseh hani dSvea aber immerno nid rächt... dänn isch dNochgeburt zimli schnäll ko.. jedoch nid komplett... 
Wo dSvea nach 20 Minuta immerno sehr sehr blass gsii isch, händs entschida dass sie mit de Rega is KiSpi flüüga muass... 
I han gmaint i ghöör nid rächt... kum uf da Wält und scho wäg vom Mami.. inan Helli... all dia Hektik... I han sie dän aber eeendli mol dörfa für ganz kurzi Ziit id Arma nä.. sie hät dÄugli göffnet und ganz ruhig gschnuufet... mini süess Bohna... und kum hanis könna gnüssa, hän sie sie in Brautkaschta tua und mitgno... i han dän ab in OPs müasa zur Uskratzig... 
Das isch zum Glück ruckzuck ganga... aber au döta hani irgend a Mitteli nid vertreit und min Puls isch ufa uf 200... i han gmaint mier käms Härz zum Hals us und es verjaggi mer da Kopf... isch schlimm gsii.. Nach dä OP hani denn aber 2 Stund!! Müasa im Ufwachruum si, will sich min BD nid erholt hät.. ständig ischer wieder in Keller gsunka... i han zur ufmunterig aber ganz tolli Föteli überko vo de Svea wos extra no gmacht händ voram Abflug... denn zruck is Zimmer... is läära Zimmer... Han denn zum Glück glii döfa uf Chur alüüta und döta hends mier könna verzella, dass es de Svea sowit guet goht... sie hät schöö sälber könna schnuufa und au ässa hät sie scho möga... wia bi i froh gsii... spöter isch min Gross mi ko go bsuacha... da hät mi schöö abglänkt.. mis Mami isch direkt uf Chur zu de Svea... üsi Muus isch jo ganz alleiga döta gsii.. Sie hät aber nur kurz döfa bliiba aber het mier ganz a huufa Fötali mitbroocht.. i bin richtig gschockt gsii, sie so zgseh... volla Kabel.. luuter grät... und so schlapp.. ma hät ira richtig agseh wia k.o. si gsii isch.. Am nögschta Tag hät aber dä Chefarzt mini ganz Verleggig nach Chur bereits organisiert ka und so bin am Mittag eeendlich bi dä Svea gsiii... äs isch sooo schööö und glichziitig so trurig gsii... I bin dän ufklärt worda, dass sie wäret de Geburt Bluat verloora hät... ma ninnt a, dass sich dPlazenta wäret de Geburt glöst hät und so Bluat über dNabelschnuar wäg isch...ganz sicher, weiss da natürli niamert... klar isch nur, dass sie da nid scho immer hät könna ha.. sust wär sie nia so gross worda... Ma hät den gwartet 2 Täg, ob sie selber das Bluat mag herstella und reguliera.. was aber leider nid klappet hät... do händs ira am 2. Tag am Obig a Bluatinfusion ge... danoch ischs schlagartig ufwärts ganga... wo i am 3. Tag id KiSpi Station bi isch sie wach döta gläga.. richtig rosa... das isch soooo schöö gsi, sie so zgseh..
am Nommi hät sie iri Sach sooo super gmacht, dass ich sie gat han dörfa mitnä.. wa für a Freud... do händ doch alli dänkt, as gäng sicher no 5-7 Täg und jetzt ischs doch no schnäll ganga.. wa für a Gschänk! Danoch hani dörfa no 3 ganz tolli Täg im Wuchabett MIT minra Svea verbringa... sie hät iri Sach nochera suuuuper gmacht und bis hüt macht sie üs ganz a huufa Freud... Mier sind unglaublich glücklich und soooooooooo dankbar, dass alles guet ganga isch... mier wüsset, dass mier ganz ganz a huufa Glügg ka händ... dSvea isch am 24.08.09 am 08.59 Uhr uf dWält ko... mit 3700gramm und 54cm!
Isch bitzali lang worda... aber es hät mier jetzt würkli gat sehr guet tua, dia ganz Gschicht mol ufzschriiba!
