Scho sed öppe de 32. Wuche han ich immer weder Vorwehe gha und somit au immer e chli Angst gha, du chönntisch z früeh cho.
So ben ich denn ab de 38. Wuche, wo du offiziell hettsch dörfe cho zemli ungeduldig worde und han alles probiert damit du chunnsch… vo Wehetee über Schweppes und langi Spaziergäng. Hed aber alles nüt gnützt.
Vom 16. Bis 21. Juni händ sech Nonna und Nonno agmäldet för es Bsüechli und ich han denn würkli ghofft, dass du i dere Ziit chunnsch, well denn dini Schwöschter grad guet versorget gsieh wär.
Du hesch aber uf dech lo warte… am 20. Juni send denn mini Närve langsam zemli strapaziert gsieh, ich ben 39+2 gsieh, zu dere Ziit isch dini Schwöschter uf d Wält cho und ich han würkli dänkt, dass du biz früehner chämtsch.
Jedefalls ben ich denn am Obig no met dim Papi z Brämgarte ide Migros gsieh und dete han ich tatsächlich es paar sehr unagnähmi Wehe gha. Diheime sinds denn öppe all 10 bis 15 min. cho. Mer händ denn no Pizza im Racletteöfeli gässe und denn ben ich nochli in Garte gange go laufe. Es hed ganz vell Junichäfer gha!
D Wehe send denn nachher öppe alli 5 bis 10 min. cho und ich han mech denn so gäg di 22.00 entschiede mal es Bad z neh. Leider sind d Weheabständ denn weder grösser worde und ich han nur 2 Wehe gha die Badwanne. Die sind allerdings so starch gsieh, dassis ha müesse verschnufe.
Eigentli händ denn de Papi und ich no welle probiere chli z schlofe, aber ich han plötzli e ganz komischs Gfühl gha und denn gseit ich well in Spital go luege. So hämmer dini Schwöschter zum Nonna und Nonno is Zimmer geh und ich han mal im Spital aglüte. Lustigerwiis hed grad die Hebamme abgnoh wo scho de Laila uf d Wält gholfe hed. E guets Zeiche?! Ich han denn gseit, ich hebi Angst, dass mer plötzli d Fruchtblase platzi unds denn ufs mal sehr, sehr schnäll gohd, well die ersti Geburt scho zemli zackig gange esch.
So hämmer denn verbieh dörfe und send öppe uf die 23.00 is Spital gfahre. Im Auto hani denn weder alli 10 min. en Wehe gha woni ha müesse verschnufe. D Autofahrt isch aber weder rächt unspektakulär gsieh und de Papi hed also ned müesse rase.
Im Spital acho hämmer zerst mal öppe e halb Stund müesse warte, well no en anderi Geburt im Gang gsieh esch. Nachher ben ich denn as CTG ghänkt worde. Ich ben denn doch froh gsieh, send mini Wehe ned weder verschwunde und s hed sie so alli 5 bis 10 min. azeigt. Rächt unregelmässig, aber doch scho zemli unagnähm för mech.
Nachere halb Stund isch denn d Hebamme cho luege. Sie hed gmeint, das seged wohl erst wildi Wehe. Do hed mech mal en churzi Panik übercho, well di ersti Geburt würkli sehr schmerzhaft gsieh esch und ich Angst gha han, dasses weder e so wird…
Denn hed sie de Muettermund no kontrolliert, de esch aber au erst fingerbreit offe gsieh. Ich hätt mer meh erhofft mit dene viele Vorwehe…
Sie hed denn gfrogt öbi ned e chli well schlofe, ich ben iverstande gsieh. So han ich denn zwei Zäpfli becho und mer send ines Wuchebettzimmer cho.
A schlofe isch allerdings ned z dänke gsieh. D Wehe sind regelmässiger worde, zerst alle 5 bis 6 min. cho, denn all 3 bis 4 min. Ich han sie zwar müesse verschnufe, aber han guet chönne demit umgoh und sie ned so schlimm gfunde. Also sie händ natürlich weh doh, aber ke Verglich zur 1. Geburt.
Es muess öppe 2i, halbi 3 gsieh sieh, womer de Hebamme mal glütet händ zum sie informiere, dass denn Wehe immer no do seged. Sie hed nomol de Muettermund kontrolliert, de esch leider erst uf 1 bis 2 Finger offe gsieh und do heds mer grad chli abglösche und ich han dänkt, ja super, jetzt gohds dänk no ewigs… esch jetzt wohl d Strof, well di erst Geburt so schnäll gange esch.
D Hebamme hed mer denn empfohle uf d Siite ligge, well so s Baby besser chan aberütsche. Do sind denn ufs mal einiges stärcheri Wehe cho! Ich würd säge öppe so starch wie bide Laila ehrere Geburt. Allerdings han ich vell besser chönne demit umgoh.
Din Papi hed denn gseit mer warted no bes am 3.00 denn düechemer nomol lüte und denn segi secher scho öppis gange. So wiit isches aber nömme cho. Ufs mal (churz vor de 3) han ich Prässwehe becho. Han denn em Papi gseit ich müessi prässe und de esch denn grad abgrännt zum d Hebamme hole! Sie send denn met mer zum Gebärzimmer grännt, ich han unterwägs no grüeft „Sch… sie chunnt!!!“. Im Gebärzimmer händs denn welle, dass ich no ufs Gebärbett wächsle, han allerdings s Gfühl gha, das segi unmöglich. Irgendwie hanis denn aber gliich gschafft. Ufem Gebärbett isch denn grad di nächst Prässwehe cho und ich han gar ned gmerkt, dass mit dere din chopf gebore isch! Nochere wiitere Prässwehe esch denn diin Körper do gsieh. Ich ben denn grad zemli unter Schock gstande, dass das e so schnäll gange isch und han en Momänt bruucht zum realisiere, dass du tatsächlich do bisch. Du, liebi Amélie Julia bisch am 21.6.2011 am 3.01 gebore worde!
Wie mer d Hebamme denn no gseit hed, bisch du mit samt de Fruchtblase usecho. Debieh han ich doch immer Angst gha devor dass die platzt und d Wehe no stärcher werded. Aber so isches denn ned gsieh.
Ich han denn no welle d Plazänta aluege, dassi das au mal gseh han.. na ja, has denn für „grusig“ befunde.
Di ander Geburt isch au langsam am Ändi zuegange und so simmer denn för es wiili eleige gloh worde, was eus au rächt gsieh esch. Irgendwenn isch denn d Ärztin cho, mech go nähe und du bisch gmässe und gwoge worde. Stolzi 50 cm und 3240 gr bisch du gsieh!
Da ich han welle ambulant gebäre, han ich eifach uf de Chinderarzt gwartet wo am 1 cho isch und han nachher hei dörfe.
Alles in allem han ich würkli en schöni Geburt dörfe erläbe und ich ben froh, dass ich uf mis Gfühl glost han und e so früeh is Spital ben. Wer weiss wo du sosch uf d Wält cho wärsch!
Alles liebi und Gueti mit eurem Turbo
