(Vorsicht sehr lang)
Die Schwangerschaft:
Schneller als mir denkt hend, hesch du dich uf de Weg zu üs gmacht....
Im Gschäft han i Afangs Januar mitteilt, dass ich nüme ällei chume go schaffe, sondern na en Buuchbewohner debi han. Alli hend sich gfreut für üs.
Alli Arzt- und Hebammeuntersüech sind tip top gsi. Nur hesch bim CTG wieder d'Nerve vo de Hebamme strapaziert und di eifach nid wecke lah.... Aber da het sie ja scho vo dim grosse Brüeder kennt... S'Einzig wo mir chli Sorge bereitet het, isch dis Gwicht gsi da du i de 37. Wuche scho 3800gr gschätzt worde bisch...
Ich han wiiterhin mini 8 - 20 Std./Wuche gschaffet bis es i de 35. Wuche nüme gange isch. Ich bin nur na todmüed is Bett kroche mit Ruugeweh und han denn glich nid chöne schlafe... Also bin i zu de Hebamme und sie isch nid verwunderet gsi, dass min Rugge weh tuet, hets mer doch en Wirbel verschobe, wo sie wieder het chöne irenke... Sie het mi denn per Sofort 100% chrankgschriebe.
Ab denn han i Ziit mit dim grosse Brüeder gnosse und na s'eint oder s'andere vorbereite, bevor du zu üs chunsch...
Am 27.Juli bin i am Abig früeh is Bett, wil i d'Nacht vorher praktisch nünt gschlafe han und han na so gstudiert, ob ich echt merke wenn d'Fruchtblase platzt?? Bim Junior1 hends sie ebe unter de Geburt ufgstoche und denn bin i ipfuset....
Die Geburt:
Am 11i bin i ufgwacht, wil ich irgendwie im Nasse glege bin... (Ja ich hans gmerkt
Also ufgstande und ufs WC und es isch nur na glofe... Also de Papi gweckt und ihm mitteilt, dass es losgaht... Während i versuecht han mini Eltere z'erreiche, het er denn scho Mal im Gebs aglüte und döte Bscheid gäh. Da d'Eltere nid abgnoh hend, hend mir de Junior1 gweckt und ihm schnell erklärt, dass Mami etz in Spital gaht und s'Baby uf d'Welt chunt... Während de Autofahrt hend denn au d'Wehe so schön im 4 - 5 Min.takt igsetzt und i han scho dörfe veratme...De Junior1 schnell is Bett tah und wiiter is Spital, wo mer vonere supernette Hebamme empfange worde sind. Ab as CTG, es het scho schön Wehe azeigt. De Untersuech het am 12i ergäh, dass min Mumu scho 3 cm offe isch. Nachdem simer na chli use go laufe, während d'Hebamme Badwanne ilaufe la het... Nach ca. 10 Minute han is nüme usghalte und mir sind wieder retour und dine na chli glofe. Juhui, Badwanne isch volle ab go Bade... Ich han mi total wohl gfühlt und han guet chöne d'Wehe verschnufe. Nach eme wiitere Untersuech (ca. am drü) isch de Mumu scho bi 8cm gsi. Phu, da isch etz aber schnell gange....
Nacheme Buscopan isch de Mumu ganz offe gsi und es isch losgange mit de Presswehe... Ich han presst und presst, doch du hesch eifach nid ganz abe chöne, da na en Saum din Weg bsetzt het. Vor luuter Stress sind bi dir denn d'Herztön abe und i han leider müesse ufs Bett wechsle. Wo ich döte gsi bin, hend d'Ärzt beschlosse dass mer au bi dir müend d'Vacuumglogge benutze, wie scho bi dim grosse Brüeder und wenn da nid klappet gits en Kaiserschnitt... Also Vacuumglogge agsetzt bi de 1. Presswehe isch de Chopf da gsi und bi de 2. Presswehe isch de Körper gebore...
Endlich isch s'Gheimnis glüftet gsi und üsen 2. Bueb het s'Liecht vo de Welt erblickt...
Du liebe Junior2, hesch am 28. Juli am 4.16 s'Liecht vo de Welt erblickt. Du bisch 53cm gross und 3980gr schwer gsi...
