I fang mal chli früener aa, mit minere SS...
Min eigentliche ET wäri de 14. November 2011 xi. Mini SS isch sehr schwierig xi.. Ich han bis i die 20 Wuche müesse jede Tag breche, und au nachher isch mir ständig übel xi.. Wo denn die Brecherei ide ca. 30 Wuche au wieder zrugg cho isch, bini ganz am End xi.
Alli hend mir immer xait, das ich sicher vorem ET werde entbinde. Da ich au schu früeh Vorwehe gha han, und die chli scho früeh tüüf im Becki xi isch. Au de Schliimpfropf isch öpe ide 35. Wuche ab.. D Hebamme het de gfunde, entweder gächs bald los, oder er bildet sich numal noche. Det han ich nu Geduld gha, zum uf eyses chleyne Wunder warte.
Die Geduld isch aber je länger ases gange isch, umso meh worde... Ain Tag um de ander isch ume, und am ET isch eyses Wunder immer nuni da xi. Ich han nüme möge warte.. Han nur nu brüelet.
I han denn nu id Akkupunktur chenne und ha mi zemegrisse, das ich nu chle durehebe.
Am Sunntig morge, 20.11.2011 am 10ni, bi ET +6, ide Kontrolle isch denn entschide worde, das am abig iigleitet wird.
Am Sunntig Abig am 8ti han ich denn müesse im Spital iirucke.
Denn zersch mal CTG und denn isch öpe am 9ni s erschte Zäpfli iigleit worde. Bi freudiger Hoffnig xi.
Mit mim GG isch abgmacht xi, das er am Mäntig nu go schaffe gaht, bis ich ne bruche. So hemmer eus denn ca. am elfi vonenand verabschidet, ide Hoffnig, das er scho ide NAcht wieder mues cho.
Es het denn all 6 Stund es wiiters Zäpfli geh, und i bi immer mal wieder am CTG ghange.. De ganz Mäntig dure, hani denn immer mal wieder veruse müesse go spaziere, go Stäge laufe, usw. Het scho chli a mine Nerve gnaget...
Am 3 isch denn zum Glück min GG wieder cho, und mir hend zeme nu chli chenne veruse. Det hani denn au namal würkli alles chenne usela, dasi nüm mag, usw. Am 10ni am Abig isch er denn wieder hai und bi mir het sich immer nu nüt tue...
Ca. am halbi 2 bini denn ufwacht, will ich uf s WC han müesse. Det hets denn recht blüetet, und woni wieder is Bett glege bi, hend d Wehe langsam aagfange... Si sind denn au relativ schnell heftiger worde, dasis scho han müesse verschnuufe. Han denn am viertel ab 2 am GG aaglüte, er sell doch bitte cho.
Die eigentlich Geburt
Am 3 isch denn zum Glück min GG da xi und i han scho Wehe im ca. 3-4 Minute Takt gha. Han aber glich nu chli mit ihm chönne rede. D Hebamme isch denn inecho, und het mi gfragt, wies usgsech, mitere PDA. Si hebi jetzt de Anästhesist müesse wecke, will di ander Frau wo am gebäre isch, e PDA welli, entweder chön ich si etz am 5i ha, oder süs wers aifach früehstens am halbi achti wieder möglich.
Bi mer sehr sehr unschlüssig xi, han denn aber au uf aarote vo de Hebi zuegstimmt, da ich halt doch sit 2 Nächt praktisch nix meh gschlafe han.
Mir sind denn in Gebärsaal züglet und er isch cho go d PDA mache. Es het nit weh tue.
Am Aafang isch alles tip top xi. Nur hani s rechte Bei nüm gspürt, so dasi gar nüm han chöne ufstah. Also bini aifach ufem Gebärbett glege am CTG aagschlosse und han mi mit mim GG unterhalte. Han denn relativ schnell gmerkt, das d PDA uf de linke Siite nit sitzt. Ich han je länger, je meh alles aafo gspüre uf de linke Siite. Au de Knopf wo mer chan drucke, das meh Mittel inegaht, het nur s rechte Bei immer nu meh taub gmacht, bim linke aber nüt gnützt. Det ischs aber nu ushaltbar xi. Han det aber scho Wehe im 2 Minute-Takt gha.
Nur uf de Muettermund hend sich die die Wehe aifach nit usgwirkt. De Befund isch am 10ni immer nu bi ca. 3 cm xi. Det hani scho denkt, uiuiui.., das chan jo nu heiter werde...
De Wehetropf hends denn immer meh ufegschruubet und d Schmerze sind immer schlimmer und schlimmer worde. Ich han aber det immer nu relativ guet chöne demit umga.
Am 12i isch de Befund immer nu de glich xi. De Oberarzt isch denn cho, und si hend berate, was gmacht wird. Det isch denn au scho s erscht mal d red vo Kaiserschnitt xi. Wills aifach nit fürschi gaht.
Si hend denn beschlosse, das si mal d Fruchtblase ufstechid. I han gwüsst, dases denn mit de Wehe warschinli nu vill schlimmer wird. Aber bin froh xi, DAS überhaupt mal epis gmacht wird, will ich det mit mine Chräft scho recht am End xi bi.
D Hebamme hed denn probiert d Fruchtblase ufsteche, si heds aber nöd gschafft. De Oberarzt selber het denn Hand aagleit und so fescht "umeguslet" und gmacht und ta, heds aber au ersch nach epe 5 Minute gschafft.. *Autsch*
Und ab denn ischs würkli los gange... Innerhalb vo wenige Minute sind d Schmerze unterträglich worde... I han en regelrechte Wehesturm gha... Han nur nur gwimmeret und gschraue, s hed so weh tue... Si hed denn d Anästhesie numal grüeft, dass si s Röhrli vo de PDA es bitz chend zruggzieh, das villicht di link Körperhälfti doch au nu chle betäubt wird. De Wehetropf hends nit dörfe zruggneh, da si xait hend, es müese ez würkli vorwärts ga, minimal all Stund 1cm. Sus gächs ab i OPs.
Nachdem denn d Anäshesie da xi isch, isch für en Moment e chli besser worde. Han det denn numal chli chönne Chräft schöpfe.
Ca. am halbi 2 hani ich denn de Hebamme grüeft, und xait, i mües stuehle, si sell mir doch bitte e Bettpfanne hole, oder i verspüri Pressdrang. Si hed sich das chum chenne vorstelle. Hed denn aber xait, si untersuechi emal. De Befund isch denn bi 10cm xi. Es heb nur nu e chliine Saum. Si isch selber sehr überrascht xi. Und ich au. Aber han riiisig freud gha, dass sich die Schmerze au bezahlbar machid. Unterdesse hed d PDA nämli wieder nüm gwirkt.
Am 3i isch denn definitiv alles offe xi. Mir hend denn mal liecht aafo presse. Aber die chlii isch aifach nit wiiter abecho..
D Hebi hed denn xait, si döfi aifach maximal 2 Stund warte, ab denn, wenn d Frau voll offe isch. Wege was, waissi au nüm so genau.
Es isch denn aber aifach nüm vill passiert. Ich han all 2 Minute stärksti Wehe gha und nur nu umegschraue. Bi am End vo mine Chräft xi.
D Hebi hed denn wieder de Oberarzt grüeft. Es isch mittlerwiile öpe 17.15 xi.
Er hed denn gluegt und xait: Losid si Frau xxxx, mir müend leider s Vacuum neh, das s Baby aifach nit wiiterchunt. Ich gibe ihne 1 Chance. Entweder funktionierts, oder süs gahts direkt in OP. D Anästhesie isch scho im Zimmer gstande. I han denn unter Schmerze gfragt: Aber kein Not-KS? Er hed denn nur xait, mol, warschinli denn scho. Si degid ez alles vorbereite. I han gar nüm alles mitbecho, bin voll im Delirium xi. Han d Wehe gar nüm gmerkt, da si de Wehetropf so dermasse ufegstellt hend, das ich gar kei Pause meh gha han.
I han nur nu eis im Chopf gha: Darinka, du gisch ez aifach ALLES was du chasch, ALLES!!!! I WOTT KEIN NOT-KS! I wott mis Chind schreie ghöre, si aaluege, si küsse und nit schlafe!!!!!!!!!!
Denn isches sowiit xi, er hed s Vacuum aagsetzt, es het nu aisch e Stufe schlimer weh tue, wo er das iigfüehrt hed, und denn heds nur nu ghaisse PRESSE!!
I han ALLES geh!!!!! Nachem presse isch mir richtig schwindlig und schlecht xi, will i nüm ha chenne. De Arzt hed denn nur xait: Ja, si chunt abe, si chunt abe, wiiter so, PRESSE!!!
Und i ha wieder presst, und er het une grisse!! Und denn hani nur min GG ghört sägä: Schatz, de Chopf isch da!! Und churz druf abe isch si da xi!!!!!!
Eysi Jamie Lya!!!!!
Si hend si mir sofort uf d Burst gleit und i bi aifach nurno überwältiget xi vo mine Gfühl. So epis schööns, wie das Gfühl, wenn mer sis eigene Baby uf de Brust gspürt, nach so langer Ziit im Buich, isch aifach unbeschriblich. S allererschte Mal si aaluege, si schmöcke, si küsse.. Wow.. Mir verschlahts ez nu d Sprach!!!
Trotz allem isch das de schönsti Tag vo mim ganze Lebe. 22.11.11
Jamie, eysi Prinzessin, mir liebid dich vo ganzem Herze!!
Nu en chliine Nachtrag
Im Nachhinein hed mer mir xait, das aich abem Mittag niemer meh dra glaubt heb, das eysi Prinzessin uf vaginalem Weg uf d Welt chunt.
Meine Tochter kaum auch mit der Glocke zur Welt und ich kann mit dir fühlen, es tut weh. 
