Mer send zom Untersuech i Spital gange! Zom goh luege wie's mir gohd...
Mumu isch ongfähr 2cm offe gsi ond ich quitschfiddel...au wenn ich pfuused han wie en Stei ond d'Ärztin wege dem öpe drü mal en Uschall gmacht häd...zom sicher sy öb au wirklich alles, alles in ornig isch...
Noch dem das alles kontrolliert worde isch häd s'Mami au scho wieder hei chönne... mit gnoh häd sie no en Wehetee...
Denn langsam aber sicher häd sie gnueg gha vo dem grosse Buch! 
30.08.05
Naja s'Mami häd sich dänkt das ich evt. ned wett of d'Wält cho well d'Geburtschärtli nonig wirklich parat sind... drum häd sie agfange de Text etc. z'gstalte ond das denn au grad dr Kollegin gmailed wo de Uftrag gha hätti das nochher z'drucke...
Us scherz häd sie s'Datum de 30.8.05 gnoh d'Ziit irgendeinisch am morge am 8ti oder nüni (weissi nöme so gnau
) ond s'Gwicht 4000kg ond Grössi 52cm ! Ond denn häre gschriibe sie möss jetzt ufhöre schriibe, sie mössi ja schliesslich die Nacht no goh gebäre...
Jaja wenn sie gwüsst hät wie recht das sie hätt... wär sie aueg um einiges Nervöser gsi... ond ned eifach so ganz gmüetlich goh pfuuse! Chorz noch de 12!
s'Mami isch so ca om die 1.00Uhr wieder verwached ond häd es komischs Gfühl im Buuch gha...
Sie häd sich allerdings ned vell debi dänkt...denn sie häd ja eh scho sitt Wochene immer wieder Wehe gah... ond doch isch es nie losgange...
Allerdings häd sie sich afoh die komischte Gedanke mache... zom Biespiel, werom das so vell Fraue schriibed das äs bim Blasesprung "Blubb" machi???
Bim Alessio häd sie au än Vorziitigeblasesprung gha... ond häd sich bim beschte Wille a keis Blubb möge erinnere...
Währed all dene tiefgründige ond Wältbewegende Gedanke, bin ich irgendwie im Buuch verschrocke...!
Bin nome no so zäme zuckt ond mit mir de Buuch! s'Mami häd das schaurig komisch gfunde...
Jäno... s'Ziel isch also gsi möglichst schnell wieder izschloffe damit mer Fit isch före nöchst Tag...
allerdings isch de Buch irgendwie immer no urruhig gsi.. ond es häd es riese geknorze gäh... wie wenn öper wörd d'Finger knackse...
Im Mami isch das Grüsch irgendwie bekannt vorcho...ond sie isch ziemlich schnell ufgstande ond of's WC gange...ond siehe da... schön 5m vorem WC isch ehres nome no d'Bei drab gloffe!
Soooooo hätted mer das also klärt...bi de Familie H bluubered d'Fruchtblase ned! Sie knacksed! Wenn's kaputt göhnd....
Das wär denn öbrigens so om die halbi zwöi gsi!
Aber da isch ja jetzt am wenig Wichtigste...
Was mer jetzt allerdings klärt gha hätted wäri gsi das es jetzt ändlich, ändlich losgohd! Schliesslich sind mer ja scho 3Täg öber Termin gsi!
s'Mami häd denn mol agfange Sache zäme packe... denn irgendwie häd sie s'Gfühl gha das sigi s'Wichtigste... mer weiss ja nie wenn ond wie fescht die Wehe chömed... Denne häd sie mal de Papi gweckt! De häd siis Glöck chuum chönne fasse! Häd er doch druf ghofft das es bi mir Tag us los gohd! Damit er mindestens usgschloffe isch... Aber nene... wär ja kei Herger wenn ich do kei Strich dör d'Rechnig wörd mache...
s'Mami häd denn im Gebärsaal aglüte... dete häd au grad die Hebamme abgnoh wo mer am SA (ET 27.08.05) zor Kontrolle gha händ... sie häd denn gmeint mir selled doch mal verbi cho ond d'Sache grad mit bringe... mössed aber ned so pressiere...
Dene isch s'Mami goh dusche...de Papi häd unterdesse i de Petra (em Mami siini Schwöster) aglüte, die isch nämlich so lieb gsi ond isch ofe Alessio goh luege...
Au häd er äs Taxi of die drü organisiert...
Nochem dusche händ's no die letschte Sache grichted ond parat gmacht wo nötig gsi sind före Alessio beziehigswiis för is Spital ond denne isch au scho d'Petra do gsi... langsam häd's im Mami au agfange im Buuch afoh zieh ond sie häd Wehe gspört...die sind doch scho starch gsi!
Aber ned so starch das mer hätt chönne meine sigi weiss ned was... Wenn er wössed wasi meine...
Jä dene händ mer of's Taxi gwarted wo denn au ändlich cho isch...
De Taxi Chauffeur häd sich riese gfreut über üs... er häd gmeint jetzt fahri er 20 Jahr Taxi! Ond dörf das jetzt doch au no erlebe das er öper zom Gebäre id Klinik dörfi fahre...
Die Freud händ mir ihm notürlich gärn gmacht... !
Sooo mer send also so ca am 03.15 im Spital acho... ond äs isch denn grad en Ultraschall gmacht worde... dete häd mer glueged öb mit mir alles in Ornig isch... isch's au gsi! d'Ärztin häd dasmal miis Gwicht of 3400gramm gschäzt... ähm ja drü Täg vorher häd en anderi Ärztin miis Gwicht of 3800Gramm gschäzt... säged also nüd dezue...isch ja eigentlich au glich...s'Mami häd eh gwösst das ich en grosse, starche wirde...
Nochher sind mer denn as CTG ghänkt worde... da isch pigobello gsi... s'Mami isch schön froh gsi häd's die Wehe wo sie gspürt häd au ufzeichned... häd sie doch chli en komplex gha well sie sooooooooooo vell Wehe gspört häd die letschte Woche ond nie isch wirklich öpis los gange!!!
Of all Fäll häd s'CTG all 3-4 Minute es Weh azeigt...ond s'Mami häd sich denn die Freiheit gnoh ond afoh mitschnuufe...denn ganz sooooooooo schmerzlos sinds denn also doch nöme gsi... puh...
Nochhere halb Stond CTG au no de Muettermund kontrolliert worde! Ond siehe da! Dä isch scho bi 4-5cm offe gsi! SUPER! Isch üs doch en Stei vom Härz gheid... well mer gwösst händ das die Wehe wennschon öpis bewirked... bim Alessio isch äs ja ganz anderscht gsi... ond drum häd's Mami immer chli Angst gha...
Irgendwenn (aueg so noch 30min ) sind mer denn befreit worde ond mer händ chli dörfe ome laufe...s'Mami isch wie en "gstörtnigi" im Zimmer omegloffe...so nochem Motto jo ned stoh blibe... nome wenn en Wehe cho isch häd sie mösse äs Päuseli mache...
d'Hebamme häd denn vorgschlage das mir au chli ofe Gang use dörfed... Sehrwahrschinlich häd sie s'Gfühl gha im Mami wärdis schöscht no Sturm bi all dene Rundene im Gebärsaal!
Also sind mer ofe Gang use... dete häd's än Uhr gha wo 04.16 azeigt häd...das weiss s'Mami no ganz genau...
im Gang osse häd's äs Bebe gha wo gschraue häd... s'Mami häd immer dänkt das es unglaublich isch das sie bald au so es chliises Mönschli dörf im Arm ha... aber wer weiss scho wie lang das no gohd???? d'Wehe händ immer wie meh weh gmacht... de Papi häd schön brav nebe dra gwarted... ond au immer gfröged öb's gohd... er isch doch sooo müed gsi... ond doch häd er üs zwei keis sekündli elleige gloh... au wenn er üs üsi Rueh gloh häd...
s'Mami findet so oder so... das es sicher mit keim andere wörd besser goh zom Gebäre... do sind mer ja no froh!
Schöscht hätted mer nämlich liechti Problem...aber da isch ja jetzt öpis anders...
Of all Fäll sind die Wehe immer stärcher gsi...ond s'Mami häd recht mösse verschnuufe ond sich a Pfoschte lehne... wobi eim grad wieder d'Frog i Sinn chond wer echt all die Finger, Händ ond Stirn abdrück dete weg putze muen???
Aber isch ja glich... mir sind optimistisch gsi ond händ dänkt.. jedi Wehe bringt öpis!!! Jawohl...also häre mit dem Schmerz...d'Hebamme isch au immer wieder miini Härztöndli goh lose ond es isch alles pigobello gsi... nach lange Wehe etc. häd's Mami wieder of d'Uhr gluegt! Ond was zeigt die doof Uhr a???? tstststs 04.34Uhr!!! Da chan's ja ned sy! s'Mami häd doch s'Gfühl gha sig scho so vell Ziit vergange... jäno... mir sind den wieder i Gebärsaal zrugg...s'Mami isch chli ofe Sitzball gsässe...was aber es cheibe zügs gsi isch...denn bi jedere Wehe häd sie s'Becki bewegt well das so guet do häd! Und schwuuuuuuuuuuups häds wieder unmengene vo Fruchtwasser am Bode gha... TOLL! Nach drü Wehe händ mer denn s'Gfühl gha das de doof Balle nüd för üs isch! Obwohl's so guet do häd!
s'Mami häd denn id Wanne welle.. d'Hebamme häd denn au grad afoh s'Wasser useloh... allerdings häd sie no schnell welle kontrolliere wie wiit das de Muettermund scho isch... also ab of's Bett...
Wo d'Hebamme am 05.00 gseid häd de Mumu sigi bi 6cm häd's im Mami scho Kriese gschobe! (Zom Glöck häd sie ned gseh was d'Hebamme im Geburtsverlauf gschriibe häd...det stohd nämlich 5-6! äs detail...för Fraue mit Wehe aber anschiinend seeeeeeeeeehr! Relevant!)
Es häd denn au gheisse das miis Chöpfli no zwiit obe isch ond die Wehe mich anschiinend ned gnueg abedrücked...sie häd denn öpis gseid vo mer lueged am viertel ab sechsi nomal ond wenn's bis denn ned wiiter donde isch tüend mer d'Wehe onterstötze... grrrrr...
Also isch's Mami id Wanne...d'Wehe send ja schön fliisig all 2 Minute cho! Im Wasser händ deför ändlich die doofe Rüggeschmerze ufghört zwüsche de Wehe... ond sie häd sich chli chönn erhole...
Vo den ewäg händ mer irgendwie de Öberblick verlore... s'Mami häd s'Gfühl gha d'Wehe siged nöme soooo regelmässig gsi... emmel sicher ned all glich Schmerzintensiv... eis isch sicher gsi... "langi" Wehe Pause wo mer so schön häd chönne idöse... häd gheisse nochher en riese Wehe... wääääääärg... jäno... ohni Schmerze chömed halt au kei Chend of d'Wält...
de Papi häd immer schön früschi chalti Wäschlümpli brocht! de Papi isch eh de bescht Wäschlümpli bringer wo's gihd! Jawohl! Nome das mer das au nomal gseid händ!
d'Hebamme häd denn zwüsched dine mal gfröged öb's Mami en Druck verspüri zwüsched düre... s'Mami häd das Gfühl scho chli gha aber ned so intensiv...das häd sie denn au i de Hebamme gseid...die häd denn au gmeint mer kontrolliered das emal...isch denn allerdings usem Ruum use gange... d'Wehe send doch afoh recht happig worde...ond s'Mami häd afoh usrechne wie lang das es ächt no gohd sprich d'Rechnig wo aueg jede kennt... 1cm/h sprich am 5i am morge 6cm plus 4Stond gehd 9ni ond das Chend muen ja au no use... also sicher nomal en stond! lieber grad 1 1/2 bim Alessio isch ja Pressphase au 2 3/4 gange alsoooooooooo ähm s'Resultat...
PDA!!!!!!!
De Papi häd gmeint das chöing sie ned mache... jetzt siged mer scho so wiit! Ond sie liggi ja au scho im Wasser, was sie immer welle häd! Somit wär alles kaputt...
s'Mami häd scho welle afoh sich öbere Papi uf z'rege...was weiss dä scho? tststs... Wenn do nome ned die Hammerwehe gsi wäred... notürlich isch die cheibe Hebamme niened ome gsi... wo sie denn is Zimmer cho isch häd de Papi anschiinend de doch zo ehre gseid das s'Mami en PDA welli *dankebrunodegedankezähltdasdumichdochnedhäschwellelohlide*
d'Hebamme häd denn gmeint sie kontrollieri mal wie wiit das mer siged... i dem Moment häd s'Mami afoh schreie ond gseid sie mössi Presse!!!!! Es häd riese brönnt ond uh cheibe Weh gmacht... s'Mami seid sie heig richtig gspürt wie mi Chopf sich dör's Becki kämpft häd! Er isch ja no wiit obe gsi...
Noch dere Wehe häd denn d'Hebamme kontrolliert... 9cm!!!! Poh... s'Mami häd gwösst das mer d'PDA jetzt chan vergässe...ond noch dere Wehe hät sie am liebste eifach nome no chönne brüele... sie häd denn au gseid das sie das nöme mögi... die lieb Hebamme häd denn gmeint "mo mol Frau Herger! Ihres Chendli chond... " Häd s'Mami notürlich ned glaubt! Häd sie doch schomal erfahre wie lang das es den aume no chan goh!
s'isch inzwösche öbrigens so ca 06.15 Uhr gsi...
d'Hebamme häd denn dr Ärztin gruefe... die isch denn au cho... im Mami siini Wehe sind chli schwächer worde... d'Hebamme häd a dem ned so freud gha... sie siged eifach z'churz!
Im Mami häd das allerdings freud gmacht! Hehe sie händ nämlich nöme so fescht Weh gmacht... jaja mer weiss ja das aueg es Chend nome met schmerz chan of d'Wält cho...aber wenn mer scho d'Wahl häd... ja denn lieber äs paar Harmlosi Wehene als öpis wo fescht weh macht... Logik vom Mami... idem Moment... d'Hebamme hedere eh nöme so passed irgendwie häd die welle das es Weh macht...
tststs... bir nöchste Wehe häd denn d'Hebamme de letscht cm verstriche... ond öber's Chöpfli gstülpt... s'Mami häd scho wieder nome gäused ond gschraue...
So vell zo dere Diskusion das sie sich das also nie chönt vorstelle ondere Gebort blablabla... naja säged mer's mal so... mir händ üsi Meinig gändered...
Of all Fäll häd de Papi ei freud gha... er häd nämlich immer zwüsched düre miis Chöpfli gseh... inzwüsche Ziit händ's im Mami de Wehetropf aghänkt gha...well äbe d'Wehe zwenig starch gsi sind... hahaha...
Bir nöchste Wehe häd d'Hebamme scho wieder welle goh umefummle...s'Mami isch de immer wie wiiter retour grütscht... d'Hebamme ond d'Ärztin händ immer gseid sie sell mit em Füdli devore blibe... tststs SICHER NED! Wenn mer genau weiss das dete Händ sind wo eim Weh möched... Naja eigentlich sinds ja ned nome Händ gsi... häd ja au schöscht Weh gmacht... aber of so details achted mer den bim beschte Wille nöme!
Of all Fäll häd d'Hebamme ihri Händ weg gnoh wo s'Mami gseid häd sie sell eweg... aber isch anschiinend en schlaui Frau gsi...sobald s'Mami d'Wehe so starch gspürt häd das sie wieder nome am schreie gsi isch häd sie mit ihrne Händ noche gholfe! *hötchansmaminomenodankesäge*
Idem moment isch s'Mami allerdings mit ihrem Füdli wieder i hinder teil vor Wanne gflüchted... de Papi häd denn reagiert... das weiss s'Mami ned mal meh... ond häd sie ar Schultere packt ond wieder före gschobe.. d'Ärztin häd au no irgend öpis gmacht ond of all Fäll wo die Wehe döre gsi isch... isch mi Chopf of all Fäll nöme im Buch ine gsi!!!!!
Ja wer hät das glaubt???s'Mami häd scho welle bös sie of d'Hebamme well die so Weh macht do häd sie mi Chopf gseh! Unglaublich!
do d'Wehe wieder chli Pause gmacht händ... mer gönnt sich ja schöscht nüd!
Häd s'Mami sogar d'glägeheit gha miis Chöpfli streiche... oh mannoooooooooo!!!
Wössed ihr was das för es Gfühl isch???? Onglaublich... das Bebe wo Monate im siim Buch gwachse isch... chan mer alänge... ond wenn mer denn no de Chopf noch links dreiht... ond de Papi vo dem Bebe gsehd! De Flipped mer fascht vor freud!!!
Bin soooo froh han ich die Pause gha! Poh was gihd das Chraft...
ir Pause händ denn die andere awäsende... sprich Hebammene und Ärztin s'Wehemittel nomal ufegschruubed.. mir händ allerdings gar nüme vo so Details metbecho... of all Fäll isch denn doch no die nöchst Wehe cho... die sind mer aber gaaaaanz motiviert agange... hehe... schliesslich häd s'Mami ned nome mi Chopf welle... drum isch fliisig presst worde ond voilà am 06:42 (de Papi ond d'Hebamme händ zwar mösse drüber diskutiere öb jetzt 06:42 oder 43! de Papi häd zom Glöck gwonne! ) bin ich of de Wält gsi!!!!
Bin mega ir Nabelschnuur verwickled gsi... keis Wonder bi dem gestrampel wo ich aume abgloh han...dum isch äs chli länger gange bis ich bim Mami gsi bin...
Bin ganz voller Chääschmiri gsi... das isch im Mami ond im Papi soooo komisch ie cho...well de Alessio isch so schön suuber of d'Wält cho... Naja aber äbe details...
Ich han ned grad brüeled das häd im Mami ond im Papi Angst gmacht...aber d'Ärztin häd den nome gseid ich schnuufi! Allerdings händ au sie gfonde ich heig ned so schön usgseh...aber ich han mi ja denn schnell erholt... ond han denn au fliisig afoh Chreie... uiii han ich das guet chönne...han nöme welle ufhöre...
Mir händ denn vo de Wanne of's Bett gwächsled... ond dete isch s'Mami denn bearbeitet worde...sprich Nochbegort abgwarted ond verneiht... mich häd sie die ganz Ziit dörfe im Arm ha... ond de Papi ond s'Mami händs chuum chönne fasse...
Glaube mir höred a dere Stell uf... well schöscht gohds no ewigkeite...
Aber äbe... sone Gebort... isch sie no so schnell... bestohd halt us vell ne Details ond all die Details sind riese Erinnerige...
s'Mami isch sooooo Glöcklich öber die Gebort... för sie isch das es riese Erlebnis gsi....
vorallem wer's Glaubt... För dass dasi of d'Wält cho sig...sigs ned mal so schmerzhaft gsi... *ähm*
Ah ja doch no chorz öpis! d'Hebamme isch denn öbrigens ganz en liebi gsi! Mir hätted kei anderi welle! Sie häd üs so guet unterstüzt! Au wenn das im Bricht ned so öbere cho isch...
Aber äbe Vernunft ond Schmerze verträged sich mängmol ned so mitenand! =)
Was ehr jetzt aber no mönd wösse...
Ich das isch
de Laurin Kaya Gebore am 30.08.05 am 06.42 met em ne Startgwicht vo 4010Gramm ond ehre Grössi vo 53cm
)
