Das wunderbarste an Wundern ist, dass sie immer wieder passieren!
Voreme Jahr bin ich no ganz relaxd gsi und ha Ziet dihei und im Schwümmbi (ich ha 2 Wuche vor dinere Geburt ufghört mit schaffe) gnosse. Natürlich bini total gspanne gsi uf dich und ha mi ab jedere Bewegig vo dir gfreuit. Ich ha aber au äs bizzeli Angst gha vor dä Geburt. Und irgendwiä bini nonig bereit gsi dich scho us mim Buuch use zlah. Ich ha di nachli wele bi mir bhalte.
Din Geburtstermin isch luut dä Ärzt dä 25.7.2013. Dä hät mer ganz genau chöne usrächne. Weisch, mir händ äs bizz Hilf vo dä Ärzt müese in Aspruch näh damit du zu euis häsch dörfe cho. Lang, lang hämmer uf dich planget und ghofft und gwartet. Und jetzt isches so wiit. Du bisch i mim Buuch und wartisch nur no bis d’Natur seit: LOS, gang zu dim Mami und dim Papi!
Am 25.07.2013 z’nacht am 02:30 Uhr häts agfange mit wehe. Aber nur ganz fiin. Ich bin nid sicher gsi ob das jetzt Wehe sind oder wieder nur Üebigswehe (heimlich hanis aber gwüsst dases jetzt los gaht. Genau wiänis dozumal gahnt han dasi mit dir schwanger bin). Din Papi und ich händ i dä Stube une gschlafe wills i euisem Schlafzimmer so heiss gsi isch. Du häsch dir glaub würkli grad dä heissischt Tag usgsuecht zum uf d’Wält cho. Aber häsch ja scho rächt. Dä Dokter hät ja gseit sellsch am 25.07.2013 cho .
Ich bin dänn sicherheitshalber doch no go bade. Und tatsächlich, diä Wehe sind nid wäg. Im Gägeteil… sie sind stärcher worde. Juhuuuuu! So um di 6i ume hämmer dänn mal am Spital aglütet. Eifach zum euis informiere was mer müend mache und obi nochli dörf dihei bliebe. Ich ha ja immer gseit ich göch dänn uf di letschte 10 Minute in Spital und bliebi so lang wiä möglich dihei…. Woni am 6i aglüte han häts gheisse ich müesi nid stresse. Sell nachli dihei bliebe und luege wiäs gaht. Ei stund spöter hani dänn dim Papi gseit: LÜT A UND SÄG MIR CHÖMED!!! Autsch hät das agfange weh tue (oder ich bin eifach ä Sissi… gottseidank hani nid gwüsst was no alles chunt). Um di 8ti simmer im Spital gsi. Sie händ aber grad soooo viel Geburte gha das no ä Frau am Undersuechigszimmer putze gsi isch wo mir cho sind. Det händs mich dänn mal an Weheschrieber aghänkt und händ dini Herztöndli gloset. Nacheme wieli hani wele go bädele. D’alternative isch dänn gsi: entweder Bädele defür mit Sicherheit kei PDA me (diä händ gmeint du chömisch dänn scho glii und bis PDA gleit seg göchs ä Stund) oder ebe ä PDA. Ich ha mi dänn für ä PDA entschiede. So um di 11i ume isch diä dänn gleit gsi. Halleluja! Ich ha ja immer gmeint das mer mitere PDA NÜT me merkt vo dä Wehe. Ja chaschder vorstelle. Mer merkts immerno, s’tuet eifach nüme so weh.
Nach em stecke vo dä PDA hämmer dänn ändlich chöne ines Gebärzimmer wächsel. Äs klimatisierts. Isch das schön gsi!! Ändlich nümä diä Sauhitz! Din Papi und ich händ nachli gschwätzt mitenand und din Papi hät no Föteli gmacht vom Zimmer und vo mir mitem grosse Buuch. Und dänn hani ä Stund lang Wältswehe gha! Trotz PDA. Wo d’Hebamme glueget hät isch dä Muetermund innerhalb vo däre Stund 4 cm ufgange. Das heisst: no öpe 2 cm und dänn isch dä Muetermund ganz offe! Din Papi het uf di halbi 3 sele go schaffe (häter natürlich abgseit). Scho wo mir gwüsst händ wänn din Geburtstermin isch und mir am Papi sin Dienstplan gseh händ, hät din Papi immer gseit mir müesid dänn pressiere und luege das du am morge uf d’Wält chunsch. Und jetzt? Tatsächlich isch dä Muetermund um di 13:00 Uhr ganz offe gsi. Au d’Hebamme hät gseit: bis am 3 isch das Büebli da. Ja chaschder dänkä. Duuu häsch ganz anderi Plän gha. Eimal sind dini Herztöndli abgsackt das mer mega Angst gha händ um dich! Aber d’Hebamme hät gseit s’seg nid tragisch gsi. Und uf sie hämmer euis total chöne verlah! Sie isch immer da gsi und wänn sie use isch hät sie gseit was sie macht und wiä lang sie wäg isch. Isch mega ä gueti gsi (und zu allem ane au grad no schwanger
). Sie hät dänn mal wele d’Fruchtblase ufstäche. Aber will dini Herztöndli do abgsackt sind hät sie das ersch wele mache wänn d’Ärzt ume sind. Da diä rächt beschäftigt gsi sind dä säb Tag hämmer nochli müese warte. Sie häts drum ersch mit dä Ärzt wele mache im Fall das mer grad müesst en Notfallkaiserschnitt mache wäg dine Herztöndli. Ich ha scho chli Angst gha. Irgendwänn isches dänn so wiit gsi. D’Ärzt sind ume gsi und d’Fruchtblase isch ufgstoche worde. Dis Herzli hät pöpperlet wiä ä Maschine. Alles tiptop. Aber dänn isches los gange! Ich cha dir also säge: JETZT händ all im Spital gwüsst das du underwägs bisch. Dä Papi seit zwar ich seg tapfer gsi. Aber ich ha s’Gfühl ich heb dä halb Spital zämägschraue 
. 3 Stund Prässwehe und du häsch immernonig wele uf d’Wält cho. Zum dich mit dä Glogge hole bisch no öpe 5mm zwiit obe gsi. Und schiends wartet mer immer 3 Stund bis mer en Kaiserschnitt macht. Ja, irgendwänn sind diä 3 Stund dänn ume gsi und mer hät entschiede das sie dich miteme Kaiserschnitt müend hole. Mir isch das rächt gsi da PDA wieder so fescht ufegsprützt worde isch dasi kei Schmerze me gha han. Aber dim Papi isches Angst und Bang worde. Er hät immer Angst gha voreme Kaiserschnitt.Da binere andere Frau PDA nid guet gläge isch händs entschiede das zersch di säb Frau dra chunt und mir händ 2 Stund müese warte. S’isch mittlerwiele scho Abig am 5i gsi. Het ich gwüsst wiäs dir nach dä Geburt gaht het ich druf bestande das du sofort gholt wirsch. Jetzt im nachhinein dänki dases vilicht dra gläge isch das mir no 2 Stund händ müese warte und du vilicht di ganz Medis au mitübercho häsch. Vilicht häsch drum nid gschnufet nach dä Geburt?
Uf all fäll isches um di 7ni ume los gange. Mir sind in OP abe und dä Papi isch sich go umzieh. Au er hät sich müese OP-gerächt alegge.
Jetzt woni das schriebe und mir namal all Erinnerige ufe chömed laufed d’Träne wieder eifach nur so abe.
Du, min grosse Schatz bisch tatsächlich genau uf Geburtstermin am 25.07.2013 am 19.46 Uhr uf d’Wält cho. Sie händ dich mir schnäll zeiget und sind grad wäg inene andere Ruum. Aber mach dir kei Sorge. Dä Papi isch immer bi dir gsi. Mir sind Träne nur so abegloffe und ich ha wiä verruckt afange zittere. Ich weiss no das mi d’Narkoseärztin gfröget hät ob sie mir öpis zur Beruhigig sell gäh und ich ja gseit han. Ich weiss au no das d’Hebamme zu mir cho isch und mir gseit hät dir göchs guet. Und ich weiss au no dasi dänn im UFWACHRUUM wieder verwachet bin. ICH HA DOCH ABER WELE ZU DIR!!!! So hani no 2 Stund müese warte bisi ändlich am 22:00 Uhr zu dir ha dörfe. Ich ha aber gwüsst das dä Papi bi dir isch und du uf sinere Bruscht dörfsch sii.
Sie händ dich im OP no zu mir bracht und ich ha di gstreichlet
ich weisses nümä. Ich bin wieder is Gebärzimmer cho, han dich bim Papi gseh
sie händ dich mir uf Bruscht ta ich weisses nümä.Oder was mir i dänä zwei Stund gmacht händ bis du und ich uf di normal Station cho sind
ich weisses nümä.Das macht mich sooo truurig. Dini erschte Stund und ich bin nid bi dir gsi oder weiss nümä was mir gmacht händ. Und dänn chunt dezue das du nid gschnufet häsch grad nach dä Geburt. S’het weiss ich nid was alles chöne passiere und ich wär eifach nid bi dir gsi.
Jetzt, fascht eis Jahr spöter bini dankbar dases dir super gaht und du sonen tolle Bueb bisch. Jedes Mami seit ja ihres Chind seg s’bescht und s’schönscht und überhaupt. Aber du bisches würklich!! Tim, du bisch s’absolut BESCHT wo mir und am Papi passiert isch! Mir liebed dich us tüfschtem Herze
In inniger Liebi gschriebe vo dim Mami
