Juhu auch wir legen los Teil 4...

[JeyJey]

Ohjeh lisettli...

Ich wörd für dUntersüech zunere FÄ, und zwar zu dere, wod scho kennsch. Du chasch ja gliich no e Hebamme näbedraa ha, han ich au gha. Für Froge rund um dSS und Geburt. Und ines Geburtshuus chasch ja gliich... weg de Teschts: Ich bi au mega schlächt, wenns um Bluet geh gaht, ich isse immer vorher öppis, trinke öppis mit Zucker und bestah bim Arzt druf, dass sie mer sBluet im Ligge nähmed. Denn wägluege und mit de MPA über irgend öppis plaudere... ich ha im Fall gar kä Tests wege Rötele etc. müesse mache. d'Hebi häts zwar welle wüsse, het denn aber au nömm wiiter umegstürmt. Aber ja, as Bluet geh muesch di eifach gwöhne... macheds halt jedesmal, und isch au guet zum dSS under Kontrolle ha, z.B. wege Ise, Zucker, SS-Vergiftig etc.

@me: Me chönnt grad wiedermal meine, ich heg es Tier im LueMai, sie tobet bereits wieder sit über 7 Stund wiene Gstöörti ume. Ich wünsche echt niemerem es Schreibaby, geschter hani so schlimmi Gedanke gha, z.B., dass ich sie am liebschte zum Fänschter us rüere wörd oder eifach warte söll, bis sie abem Wickeltisch gheit. Machi natürli nöd... aber sowiit bini bereits... als Ussestehende / nöd Betroffene chamer das nöd verstah (hätti vorher sicher au nöd), aber wenn mer denn sälber betroffe isch und ständig im rote Bereich lauft scho. Cranio het nüt gnützt, Osteo bis jetz au nöd, ich chum echt an Aschlag. Bi nöch devor, ine Schreiambulanz zgah oder zunere EEH-Therapie. 7 Woche Dauerschreie isch schwär z'erträge. Und es Ändi isch ja au nöd in Sicht...

@alli Hibblerinne: Ich dänke vill a eu, lise da oft still mit, und drücke eui natürli wiiterhin fescht alli Düüme. Es chunnt guet. Irgendwenn.

[chacha80]

@ jeyjey, habe dir eine PN geschickt, gruss chacha

[missre85]

@lisettli das fengi schön! Wöit der no hürate bevor sChend chont?
Chani mer guet vorstöue, so gahts mer emmer bevor TR chont!
oh jeh, tuet mer leid, dass du sone schlächti Erfahring hesch müesse mache..Cha der leider nüt Speziells rate, aber das was dJeyjey gseit het schiint ja e gueti Idee zsi! Hoffe du fengsch e gueti Hebamme ond chasch de vo jetz a uf die Termine fröie..
Vor luter ÄRger hesch nämlech gar ned meh verzöut..het sHärzli pöpperlet ond di Ma Fröid gha?

@jeyjey oh nei, das tönt ja ganz schlemm be der! Cha mer guet vorstöue, dass me denn setig Gedanke het! Hoffe sehr, dass du baud dr Grond fengsch onds chasch behandle..

[JeyJey]

@chacha80: Danke villmal, het sehr guet tah zum Läse. Chunnsch denn no en Antwort über!

@lisettli: Nomol wege Hebamme oder FÄ: Ich wott känere Hebi z'nöch trätte, aber min Körper vertraui i dere Sach wörkli lieber em FA aa. Es isch doch en Unterschied, öb öpper 6 Johr Medizin studiert oder e Hebamme-Usbildig het. Ich ha sehr Respäkt vor Hebamme, sie wüssed extrem vill dur ihri meischt langjährigi Erfahrig - aber ebe: Untersüech lieber bim Arzt. Ich ha aber abem 3. Monet Begleitig gha dur mini Hebamme, sie het genau gwüsst, was ich vo ihre will und was nöd und es isch ok so gsii für sie. Und im Wochebett nochher het sie mich super betreut. Leider isch sie denn au a ihri Gränze cho, well d'Cranio nüt gnützt het, wo sie bi de Chliine gmacht het. Aber ich wörd alles bim 2. Chind wieder gliich mache. Nume d'FÄ wirdi verloh und wirde zu dem FA wächsle, wo Belegarzt gsii isch i de Klinik. Ha ihn super gfunde bim letschte US. Alles sooo genau erklärt und het mer super zueglost und mini Froge beantwortet.
Aber ja, muesches unbedingt so mache, dass es für dich stimmt, es isch din Körper und dini SS!! Drück dich, das chunnt sicher guet!

@me: Ich ha geschter inere Schreiambulanz aglüüte und glaubeds oder nöd: Sie händ bis am 18. Juli zue. E Frächheit, dass mer sich denn Ambulanz dörf nenne... tja. Ich cha am 12. mit de Chliine jetz i sone energetischi Babybalance-Behandlig. Hani mal imene Text vo Wir Eltern gläse, das sell anschiinend Wunder wirke. Naja. Nützts nüt so schads nüt.
No zu öppis anderem... wenns für eu ok isch, gsell ich mich denn ab Herbscht gern wieder zu eu mir wänd scho glii uf euses zwöite Wunder hibble.

@Hibbel-Ladies: Wo stönd ihr so i euem Zyklus / ÜZ? Bi irgendwie nömm so ganz up-to-date. Aso nor, wenns eu nöd z'müehsam isch, sosch liesi denn irgendwenn mal chli noche.

[JeyJey]

@Blevita: Chönntsch du ächt mini Agabe uf de erschte Siite no ergänze...? Es isch de 1. ÜZ gsii und die Chliini isch am 2.5.2016 uf dWält cho. Danke villmal!

[lisettli]

@jeyjey: jo bi mr ernsthaft am überlege zu mim alte FA zgo und nochher e hebamme derzue neh.
Bi mir isch ebe das thema noodle nit nur bizi unagnähm, ich lied wirklich do drunter, sobalds um das goht isch bi mir fertig, ich chume richtig in panik fang a zittere und schwitze und hül nur no wiene schlosshund und das 2-3 Täg nochher no. Ha grad gest obe wiedr e völlige zämebruch gha, ha sogar über e ss-abbruch nochedenkt es isch wirkli nit luschtig. Ich versuech jetzt übere Kollegin wo Ärztin isch mich süferli a das Thema aneztaste. Bluet muessi nit jedesmol abgeh, zum glück, es het gheisse 4x. Wobi ich noni so sicher bi, dass ich die 4x schaff...
Oje das tönt jo wirkli schlimm mit dinere chline... hoff ihr findet gli de Grund!

@missre: kei ahnig ob das härzli chlopft, sie het nur d gebärmuetter abtastet, eus es paar Merkzettel id finger druckt und mi denn zur bluetentnahm druckt...

@alli hibblerinne: wie gohts euch? Druck euch ganz fest d düüme!

[missre85]

@jeyjey das fengi auso ou ned cool, e Ambulanz het för me emmer da zsi!! Hoffe sehr, die Therapie schlat ändlech a!
Vo mer us chasch gärn met mer hibble, fa ja abem Oktober weder a! Ab wenn wöit der weder loslege?

@lisettli ah ok, das luege Hebammene dämfau ou ned?! Oh jeh, dini Nadle-Phobie tönt ja extrem! Hesch mau öpis erläbt? Oh nei Süessi, dänk ned so wiit, es chont secher guet,sschlemmstefaus Bluetentnahmene ufs Minimum beschränkt..

@all ja heeee, wo siid der denn auui? dFerie sei doch döre..

@me mer fröie üs scho ufs Herbstferie, göi denn uf Hawaii und San Francisco! Hoffe es klappt aues!

[Ena87]

Hallo zusammen

Bin neu hier im Forum und in diesem Thread und würde mich gerne euch anschliessen wenn ich darf.

Vielleicht kurz zu mir: Ich bin (noch) 28 Jahre alt und seit gut 11 Jahren in der gleichen Partnerschaft. Seit diesem Monat sind wir verheiratet.

Wir planen nun unseren Kinderwunsch, nächste Woche werde ich die letzte Pille nehmen und dann kann das Hibbeln beginnen Ich freue mich schon darauf!
Wir hoffen natürlich, dass es bald klappt, aber es kommt wies kommt. Nach 11 Jahren ununterbrochener Pilleneinnahme kann es schon etwas dauern...
Die sonstigen Voraussetzungen bei uns sind gut, wir sind beide noch einigermassen jung, fit, sportlich, schlank und ernähren uns gesund. Wir sind beide Nichtraucher und trinken kaum Alkohol.

Ich freue mich aufs Hibbeln mit euch zusammen!

Liebe Grüsse,
Ena87

[JeyJey]

@missre: Mir wänd so ab Mitti Sept wieder hibble oh wow Hawaii, so cool!! Das stat au no bi eus ufem Plan. Wenn die Chliini nöd scho cho wär, wäremer im Auguscht zum 5. Hochziitstag uf Vegas nomol go hürote und denn uf Hawaii go "flittere".

[JeyJey]

@lisettli: Uiuiui, da muesch fascht therapie-technisch öppis mache. Ich dänke da nor au scho a d'Geburt sälber; i de Regel leggeds der det so oder so en Infusion, egal öb KS oder Spontangeburt. Das stresst di denn ja grad nomol... guet, öbs das im GH mached weissi halt nöd. Oder wenn z.B. en grosse Isemangel hesch während de SS chunnsch denn ev. au mal en Infusion über.
Ich bi aso wörkli au en rächte Schisser, was das elände Bluet geh und Infusione legge agaht, aber so dumms tönt, me gwöhnt sich draa. Am Afang vo de SS hani nor im Ligge chönne und gege Ändi denn im Sitze, ohni ohnmächtig z'werde. Bestah am beschte eifach würkli druf, nur im Ligge Bluet z'geh. Und ev. Musig und Chopfhörer mitneh? Oder ebe mit dem MPA pläuderle. Und am beschte dir gar nöd z'fescht vorstelle, was die jetz genau mached... oder ev. öpper mitneh, wo der d'HAnd hebt und dich ablänkt? Ich bi a de Geburt mega froh gsii, dass min GG mich bim Infusion legge mit dene doofe Papiertierli abglänkt het, wo mer zur Geburt eis döf uswähle, wo denn de Name vom Chind druf chunnt...

@Ena87: Ich ha au 11 1/2 Jahr d'Pille (Belara) gnoh und es het nacher glich grad im 1.ÜZ igschlage. Mues also nüt heisse. Wünsch der fröhlichs Hibble.

[Astin]

Hallo zäme

Sorry, dass ich mich da so "iimische", ha ds Thema grad chle verfolgt, wels mi eifach wunder nimmt aber au, wel mier bis vor es paar Täg dänkt hend, s 3ti Wunder kündigt sich a (ungeplant) und ich drum immer nu chle im möglicherwiis-ss-odr-gli-wieder-ss-Modus bi.

Ha nur churz e Input für dich, lisettli: Ich ha bide zweite SS e freischaffendi Hebamme gha, wo mich betreut het, näbed em FA. Sie hätti au d Bluetabnahme gmacht, das einzig, wo sie nid cha sind US. Sie hed sich au immer meeeega viel Zit gnu für mich und ich dänk, es chönt e Lösig si, dich mitere freischaffende Hebamme (mini hed nur so 15-20 Geburte im Jahr dass sie bi allne cha derbii si ) i Verbindig z setze. Sie hetti sicher au meh Ziit und Geduld für Bluetabnahme und seit eher no mal, dass ei Bluetabnahm nid so wichtig isch odr so. Und e Teil vo de Untersüech chamer ja au mitem Piks i Finger mache.

Allne Hibblerinne und Schwangere alles, alles Gueti für die ufregendi Ziit!

[lisettli]

Hoi Zämme
Jö danke Missre, es duet ame echt guet wenn eim eifach öber chli chan verstoh und me sich nit nur vo überall muess alose, dass es doch nit so schlimm isch... Jo, ich ha mini halbi chindheit in de spitäler verbrocht, leider hei si dört nie geduld gha und hei mich förmlich vergwaltigt, 3-4 Krankeschwöstere hei mich ufs bett druckt während sie d infusion, sprützi oder was au immer gmacht hei. Drum chan ich au nit anelige bi so sache.
Abr das gspröch gester mit minere Kollegin het mr echt guet do, wies dr zuefall het welle, han ich sie nie gfrogt was für e ärztin sie eigentlich isch und es het sich usegstellt dass sie gynäkologin isch. Het sich grad super troffe. sie het mr zwar gseit, dass sie keini nodle bi mir wött setze, da sie eifach nit so routiniert isch will sis nie muess mache und sie möcht nur öber guets an e angstpatient wie mich aneloh. abr sie het mr mega viel froge chönne beantworte und sache erkläre, au mir de druck neh, es bressiert gar nit so mit dere 1. Bluetentnahm wie die Hebamme do het. ich ha no guet 4-6 Wuche zit und für d geburt im Geburtshuus gits au ke infusion. sie frogt mol im spital ume, obs irgendöbis git wo mir chönnt hälfe, bi no uf en hypnosetherapeut gstosse wo mr allefalls au chan hälfe, und denn isch mr no in sinn cho, dass ich e tante han wo Krankeschwöster isch, an das hani gar nüm dänkt... als Krankeschwöster wird me wohl chönne Bluet abneh, das isch jo daily business für die. ich han jetzt mol hüt zobe mit ihre abgmacht, viellicht cha si mol mit mir ahnesitze und sich wirklich zit neh ohni de Termindruck wo en arzt het und sich uf mis tempo istelle. Ich bi grad mega erliechteret und froh und ha au wieder chli chönne hoffnig schöpfe dass ich das chan schaffe.
Denn wird ich mich do inne langsam au zruggzieh, wird abr sicher no ab und zue mitläse und euch d düüme drucke!
@missre: wür mi mega freue, wenn mr chli in kontakt bliebe

@astin: danke für de tipp ich lueg mol no was wie witers goht.

@Ena87: härzlich willkomme, obwohl ich mich jo am verabschiede bin. ich wünsch dir e tolli und churzi hibbelzit!

[missre85]

@lisettli ou wenn för me sstäche ned schlemm esch, tueni ou niemer verurteile, wo Müeh demet het! Schliesslech gets ou ergend e Angst wo eg ha, wo angeri vellech ou ned chöi verstah..So gahts ja jedem..! Aber be der esch ja ganz klar, dass du e Phobie entwecklet hesch, nachdäm was du Armi aues hesch müesse erläbe-ond das no aus Chend, tuet mer mega leid!
Oh cool, esch ja super, dass dini Kollegin grad Gynäkologin esch ond dass se der het chöne häufe! Be mer secher, dass du schlossändlech dank ehre ou no dörfsch e schöni SS erläbe.. Hoffe se fengt öper wo guet sticht..! Hypnosetherapie tönt ämu ou guet, esch secher ou ned schlächt das Problem azgah!
Hoffe dini Tante het der jetz ou nachli chöne häufe..?!
Oh schad gahsch jetzt defintiv, aber verstahs natürlech..! Wör me auso sehr fröie in Kontakt zblibe!

@jeyjey ui, wenns be üch weder so rasch klappet, heit der e chorze Abstand.. Oh cool, wär secher e schöne Plan si, aber hey, jetzt heit der deför es angers Hochzittsgschänk!

@Ena härzlech wöukomme be üs! Wönsche der ganz e schöni ond chorzi Hibbelziit

[lifa2016]

Huhuuu zäme

Han mal wieder welle es grüessli dalah für alli hibblerinne da inne

Ich druck euch dume daser bald in folgethreadchönd cho! Wär schön wenn mal wieder chli läbe in de ander thread cho würd

Blevita & bienli, wie gahts euch?

@fiona & lisettli: wie gahts euch? Hoffe es isch alles guet mit de würmli und allfälligi arztproblem händ sich in luft ufglöst

@me: mir sind scho ins dritt trimester gstartet. Gaht unglaublich schnäll. Em chline Prinz gahts guet und er isch sehr aktiv. Lieblingsbeschäftigung: mami in d (wenn möglich voll) blase gingge

Ganz liebs grüessli
Valea

[Blevita]

Hallo zäme

@ jeyjey: ich hoffe so fest das die energetisch Babybalance-Behandlig oi öpis bringt, es tut mir so leid ghöre dass ihrs so schwer händ. Heb dure, du schaffsch das!

@ missre85: oooo ich bin im 2011 in Hawaii gsi und im San Francisco im 2008, Mega cool. Da chasch dich uf öpis freue

@ Valea/lifa2016: wow scho z'dritte Trimester, die Ziit vergaht wahnsinnig schnell. Es Büebli? Gratuliere herzlich! Glaub mir ich würi so gern in andere Thread wechsle

@ me: ÜZ 26.....

[JeyJey]

Ach man Blevita, es tuet mer amig so leid z'läse, dass es bi dir wieder in nächschte ÜZ gaht... Händer jetz en Termin bi de KiWu-Klinik chönne abmache oder isches nach wie vor käs Thema?

@me: Am So isch TR cho, döf aso ab Herbscht de wörkli wieder mit eui mithibble GG het zwar gfunde, me chönds ja jetz eifach drufabchoo lah, aber ich finde, dass die Chliini mindeschtens es Jahr alt sii sött, d.h. früehschtens - allerallerfrüehschtens - hibble ab TR Ändi Auguscht. Falls de Zyklus überhaupt scho regelmässig isch wegem Stille...

[missre85]

@jeyjey woooow, das esch ja rasch gange! Denn chas ja wörklech baud losgahm super!

@blevita oh nei, tuet mer mega leid, dass du sone schwäre Wäg hesch zo dim Wonschchend! Schliesse me dr Frog vor Jeyjey a: wärde der witeri Massnahme ergrife jetzt?

@lifa no aues Guete före Rest vor SS! Hets be der kei Problem gä nor met eim Eileiter? (Froge, wöui eventuell ou nor no eine ha)

@ me ha gester nachegrächnet ond gseh, dass mini Pille scho im Septämber fertig esch, dörf scho denn weder afa hibble, jippiiee!

[JeyJey]

Hey so cool missre, denn chömmer ja grad zäme hibble

[missre85]

@jeyjey cool,de beni ned ellei da enne!

[Blevita]

Hallo jeyjey und missre85

Danke oi viel mal. Mir löhnd ois jetzt überwiese aber das gaht halt na es momentli bis mer en Termin bechömet. I de zwüschetziit wird min Maa ab September mit Akupunktur ahfange.

Jeyjey, Wow, bi oi gahts zack zack vorwärts wie viel Chind möchtet ihr gern??