Nachdem unsere Erste Tochter in windeseile im Geburtshaus zur Welt kam ( http://www.swissmomforum.ch/forum/viewt ... 21&t=90423 ) entschieden wir uns bei nummer zwei für eine Hausgeburt.
Liebsti Estelle
Ich möchte dir verzelle wie du de Weg zu eus gfunde hesch. Lang hani müesse ligge, will du zfrühe hesch wölle zu eus cho. Termin wär eigentlich de 18. Februar gsi, aber an das Datum het niemerds meh glaubt. De Arzt het am 13. Januar no zu mir gseit gha dass mir de Termin am 04. Februar wahrschienlich nümm werde bruche bi ihm. A dem Nomitag hani denn eusere Hebamme, aglüte und ihre dass verzellt vom FA. Sie isch denn de Meinig gsi, sie chäm scho am 24. Januar ihri Kontrolle cho mache. So isch denn klar gsi, dass wenn du abem 25. Januar cho wotsch, du das ab denn diheime dörfsch.
Am Dunnstig Nomitag hani denn regelmässigi „Weheli“ gha sie händ nit weh to abre egal wasi gmacht han, de Buch isch regelmässig hert worde und wills bi dinere grosse Schwöschter so los gange isch hani es Bad gno zum luege öp sich was änderet, das isch nit de Fall gsi also hani de Hebamme aglüte und abgmacht, dass wenns schlimmer wird ich ihre nomol alüte.
Din Papi isch denn go schlofe will er frühe uf het müesse. Ich bin denn sehr spot au go schlofe was au super klappt het. Aber chum bini wach gsi hets wieder agfange und wills bis zum Mittag immernonig ufghört gha het hani nomol de Hebamme aglüte, damit sie nachem Mittag verbii chunt und din Papi isch e chli frühener vom Schaffe heicho.
Mir händ de Ganz Nomitag demit verbrocht, alles vorzbereite und parat mache, will mir nachem erste Untersuech alli ganz sicher gsi sind das du a dem Fritig scho uf dWelt chunsch, de Muettermund isch am ufgoh gsi, mir händ aber nit mit dim Stuurchopf grechnet
. Ich bin denn au churz e chlini Rundi go laufe mit de Hebamme zäme, han denn ammigs müesse ahalte zum mich uf dWehe verarbeite, wo mir wieder diheime gsi sind hani denn Hunger übercho und so isch din Papi für mich e Pizza go hole. Ich han denn eifach zwüsche de Wehe gesse. Am 7ni Zobe het dHebamme denn gfunde sie goht jetzt nomol Hei. Wenn dWehe wieder stärcher werde sölle mir nomol alüte, denn chöm sie wieder.Mir händ denn de Rest vom Obe mit Wehele verbrocht. Din Papi isch denn e Rundi go Game und ich han Ferseh glueget und zwüscheduure immerwieder chli döset. Bin immer wieder wach gworde weg de Wehe, aber es isch guet ushaltbar gsi.
Am Samstig Morge isch dHebamme wieder verbii cho und het no einisch kontrolliert wies usseht, wenigstens händ die Wehe öppis bewirkt, de Muettermund isch scho uf 6 cm offe gsi, also hämmer alli wieder denkt, jetzt denn chömsch du. Aber dWehe sind wieder uregelmässiger gworde und schwächer also het sich dHebamme wieder verabschidet und het gseit sie chöm uf die 6i wieder, mir sölle aber alüte falls dWehe wieder stärcher werde. Am 3 am Nomitag hani es paar ganz fiesi Wehe gha woni sogar han müesse veratme, din Papi het denn de Hebamme aglüte will dWehe sogar im 5 Minute Abstand cho sind, sie isch denn cho (sie het denn sogar demit grechnet du sigsch uf de Welt wenn sie achunt). dKontrolle het denn ergeh, dass de Muettermund 8 cm offe gsi isch, also isches wenigstens vora gange. Aber wie scho vorher sind Wehe wieder unregelmässiger cho und sind au wieder schwächer worde, so isch dHebamme am sechsi wieder gange. Mir händ denn aber abgmacht, dass wenn du bisch am Sunntig Mittag nonig do bisch, mir denn mol luege zum mit Akkupunktur e chli nochezhelfe.
Din Papi het denn Znacht kochet und mir händ gesse, ich han immer wieder müesse unterbreche weg de Wehe aber es isch gange, bin zwar e chli frustriert gsi wills nit so schnell gange isch wie alli, also au ich, erwartet händ. Din Papi isch denn wieder chli go game und ich han e chli fernseh glueget und mich uf dich konzentriert. Wo din Papi denn gfunde het er liggi chli äne hani das e gueti Idee gfunde und au e rundi wölle schlofe, da ich langsam müed gsi bin. Schlofe hani aber nit chöne. Han also wiiterhin dWehene verarbeitet und de Papi het mir im schloff bi jedere Wehe de Rugge massiert churz nach Mitternacht isch din Papi wieder verwachet und het no en Snack kochet will ich scho wieder hunger gha han. Plätzlich sind Wehe würklich schmerzhaft worde es isch so um die zwei am Morge gsi. De Papi het denn wieder de Hebamme aglüte. Sie isch denn cho und ich han no es zietli Wehe veratmet. Ich han langsam würklich nümm möge. Am vieri oder so händ dHebamm und de Papi gfunde, dass mir dir jetzt müend e deadline setzte, will ich das wohl nümm de ganz Sunntig mitmachi. Also hämmer eus uf Sunneufgang ca. achti geinigt.
dWehe sind denn wieder e chli unregelmässiger gworde und ich han langsam angst übercho, dass mri würklich no ins Spital müesse, also hani ganz fest uf dich igredet, dass du doch bitte gli cho söllsch, du hesch wohl eifach no chli wölle mini Geduld teste
churz vor de füfi het dHebamme gfunde ich söll doch no chli probiere zwüsche de Wehe zdöse, da ich würklich müed gsi bin hets sogar klappet. Denn hani e Wehe gha, füf minute gschlofe, wieder e Wehe, 11 Minute gschlofe, wieder e Wehe, 20 Minute gschlofe (dHebamme het für mich uf Duhr glueget ) wieder e Wehe und wärend ich mich id Position brocht han zum dWehe zveratme isch dFruchtblose, am halbi sechsi, platzt Ich han mi so gfreut will ich gwüsst han jetzt gohts nümm ewigs.Ich han mich denn uf dSiite müesse ligge, damit du de letscht „Rank“ no findsch, das hani als sehr unagnehm gfunde zum dWehe zveratme, aber das isches mir wert gsi
plötzlich hanis Gfühl gha ich müess liecht mitpresse und han das de Hebamm gseit, sie het denn glueget und gmeint, es sig zwar no e chline Suum ume, aber ich dörfi ganz liecht mitschiebe, und sie hebi de Muettermund e chli zrugg. Das het denn super klappet und um die halbi achti ume sind denn so starchi Presswehe cho, dass ich gar nümm andersch han chöne als mitpresse. dHebamme het mi denn zwüsche de Wehe bremst obwohl ich am liebste eifach wiitergmacht hetti, aber dank ihre hani kei Verletzig devo treit 
Innert drei Presswehe bisch du uf de Welt gsi und du bisch nonig mol ganz gebore gsi do hesch du eus scho agmotzet 
und hesches sogar no gschafft zwei Minute bevor Deadline abgloffe wär uf de Welt zsi Übrigens wärend mir bi dinere Schwöschter chum händ chöne, dGeburtskerze azzünde, hesch du genau uf dä Moment gwartet wo dini grad erlosche isch
Ich lieb di über alles min Schatz und bin unglaublich stolz uf dich, dass du die strengi aber schöni Geburt so toll mitgmacht hesch.
Dis Mami
