Lang hän di Papi und ich diskutiert und studiert öb mir jetzt „scho“ ä Kind möchte. Ich hät scho sit 2 Joor scho gern ä Kind gha. Im 2009 het di Papi aber gfunde er fühl sich noni bereit. Dr Wunsch nachere Familie isch bi mir aber gwachse und ich ha immer widr mit dim Papi drüber gredet. 2 Joor lang ischs immer widr ä Thema gsi und ich ha nid locker glo. Mir sin im letzte Joor vom Medizinstudium gsi und ich ha mi scho beworbe und äu ä Stell zuegseit beko. Ich ha dim Papi gseit dass ich jetzt ä Entscheidig bruch, Job oder Kind. Für mi zimlich überraschend het denn di Papi gfunde mir sölles woge und s Projekt Familie in Agriff nä. Morn voreme Joor (Silvester) hämr zämä agstosse ufe Joor mit hoffentlich vilne Veränderige.
Und siehe da: 6 Wuche spöter hani scho s Gfühl gha ich sig schwanger. Ha aber denkt das ka nid si dasses grad klappt het und ha denkt ich bild mir das sicher nu i will ichs mir so fest wünsch. Aber nei!!! Dr Schwangerschaftstest het tatsächlich ä Huch vomene 2.Strich azeigt! Ich ha das sehr emotionslos zur Kenntnis gno, ha denkt das ka nid si! Di Papi isch inde Skiferie gsi und ich ha ihm nüt gseit. Am Samstig isch er heim ko und no immer ha ich gschwige. Am Sunntig morge hani denn nomol ä Test gmacht. Do isch denn dr 2. Strich scho dütlicher gsi, aber will ichs nid glaubt ha hanis fotografiert, zum di Papi nocher froge öb ich spinn! Ha denn ä Kinderüberraschigsei präpariert und s Spilzüg usegno und in s gelbe Ei ä Zetteli glegt wo drufgstande isch „Juhuuui, du wirdsch Papi“. Denn hani alles widr schön zämä gmacht und s Schoggiei widr verpackt und dim Papi gä. Er hets denn ufgmacht und isch ehrlich gseit recht bleich worde... Am Afang hani mi äu noni sooo gfreut, bi irgendwie völlig dure Wind gsi!!! Doch scho nach 2 Wuche ischs Freud grösser und grösser worde, äu bi dim Papi! Vor allem wo er di denn äu het könne spüre het er di immer ganz lieb dure Buch gstrichelet. Am Afang hets so usgseh dass du eher ä Bueb bisch, denn hets irgendwenn gheisse eher ä Mäitli. Aber so richtig zeige heschs nie welle! Öbe indr 30.SSW hani vomene Mäitli namnes Juna träumt. Am Morge hani denn no denkt dass das eigentlich no ä schöne Name isch. Ich ha denn nochgluegt wases bedütet: die Erwünschte, Wunsch, die Erhoffte. Was füre passendi Bedütig für unsers Kind! Vor allem di Papi isch nach afänglicher Skepsis Füür und Flamme gsi für dä Name. Mir hän uns aber noni definitiv welle entscheide, sondern erst wenn mir di gsehn. Du hesch scho viel erlebt mit uns: Staatsexame, Konzert, Umzug, etc.! D Schwangerschaft isch super verloffe und pünktlich am Obe nach dr letzte Priefig afangs September hän die erste Vorwehe agfange! D Fraueärztin und ich hän nid denkt dass du no bis Endi Oktober im Buch blibsch. Mir hän am 1.Oktober no züglet, Wänd gstriche, tapeziert, Laminat verlegt, dis Zimmer her grichtet... Denn isch alles parat gsi und du hätsch könne ko! Aber neeei, du hesch dr Zit glo! Mini Ruckeschmerze sin als wie schlimmer worde und ich ha mir soo gwünscht dass du usekunsch, ich di ka hebe und endlich widr ufem Buch schlofe. Ich ha gläub so zimlich alles probiert damit d Geburt los got: Putze, spaziere, schwimme, ich ha jensti Sache gesse wo sötte Wehe mache, Himbeerblättertee trunke, in Heubluemeextrakt badet...Alles ohni Erfolg! Am 14.10. het sich denn ä grosse Teil vom Schlimpfropf glöst und ich ha scho ghofft dass du vilicht no an däm Tag (Geburi vom Grosr) ufd Welt kunnsch. Pah, nichts da! Widr sin einigi Täg vergange ohni dass sich gross öbis do het.
Am 30.10. hani denn s erst mol licht bluetige Schlim gha. Ich ha gwüsst dass das ä guets Zeiche isch füre baldig Geburtsbeginn. Am 31.10. bini denn am 5.00h ufgwacht wegere Wehe. Das isch aber meh ä mensartigszieh gsi. Ich ha denn no ä reguläre FA Termin gha. Dört isch denn useko dass du im Moment ä Sternguckerli bisch und äu nid grad ä Lichtgwicht bisch. Wege dem und will ich so starki Ruckeschmerze gha ha het mi d FA füre 2.11. im Spital aglüte, um übere eventuelle Kaiserschnitt z rede. D FA het no gseit dassd Babys denn köme wenn sie d Fraue im Spital agmolde heig. Jaja, wers glaubt...! Ich ha sowieso nüm dra glaub dass du uf natürlichem Weg ufd Welt kunnsch und ä Kaiserschnitt wär für mi äu ok gsi. Am 31.10. simr denn no in Hornbach und zobe bi dim Gotti zum Esse iglade gsi. Dr ganz Tag dure hani immer mol widr ä Wehe gha, aber nüt spektakulärs. Zobe ischs denn regelmässiger worde und äu bitz stärker, aber seeehr guet ushaltbar. Trotzdem hani nüm könne schlofe und bi denn öbe am 2 znacht mol ins Internet und ha mitere Studiekollegin chattet. Hm, äu 6 Joor Studium nütze in dem Moment nüt: Sölli ins Spital alüte, jo, nei, machi mi lächerlich??? Ha denn mol ä Bad gno. Aber äu denn sin d Wehe weder stärker no hüfiger worde. Öbe am 3.00h hani denn mol ins Spital aglüte, d Wehe sin denn öbe all 10 Minute gsi. D Hebamme het gmeint ich söll mi am Morge nomol melde. Ich ha denn mol di Papi gweckt und er het mir no d Fiess massiert und so. Am Morge hämr zmörgelet und will alles immer no glich gsi bi hani im Spital aglüte und ha gseit ich möcht verbi ko. Schliesslich ka das jo nüm ewigs so witergo, ha jo scho 1 Nacht nüm pfust. Ha denkt die könne di jo äu grad jetzt per Kaiserschnitt usehole, normal got das jo eh nid! Also ca uf die 11.00h ab ins Spital mit Wehe wo no voll z ertrage gsi sin. Im Spital hets ä CTG gäwo äu Wehe azeigt het, Mumu 1cm offe. Naja! Ich ha denn gseit ich gang nomol heim, muess jo nid dört warte. Ufem Heimweg hani denn em Papi gseit er söll no bim Bäck ahalte, ich möcht no ä Silserli esse. Dört ufem Parkplatz hani denn aber ä mega Wehe gha und ha dim Papi gseit er söll mi heim fahre (ganz nachem Prinzip: deheim isch denn alles widr guet!). Also heim, ind Wohnig und denn buuuum, wie agschosse plötzlich mega Wehe woni ha miesse veratme! Denn hanis gschnallt, DU KUNNSCH!!! Also het di Papi widr dr Hebamme aglüte und gseit dass mir widr köme. Dr Weg vom Auto in Gebärsaal isch nid so cool gsi, do het sich dä Mensch wo das Spital plant het nid viel drbi denkt. Im Kreissaal goht d Türe uf und wer kunnt ine: d Nochberin vo mine Eltere wo dört als Hebamme schafft! Perfekt! Sie sig hinter uns ins Spital gafhre und heig sich no gfrogt öb mir echt zum Gebäre kömme. Sie het gfrogt öbs ok isch wenn mir zämä gebäre. Ich bi so froh gsi, eifach perfekt. Sie het mi untersuecht: scho 3 cm! Ich has nid so berauschend gfunde, weme seit dass ä Erstgebärendi duchschnittlich 1h füre cm brucht. Irgendwenn isch denn d Fruchtblose platzt, mi Kommentar: ou nei, äu das no! Zum Glück nid uf dr Tempurmatratze! Ich bi denn no paar mol ufs WC go flueche: Wieso het mir niemerts gseit dass das sooo weh tuet, ich hät das niiiiiie gmacht! D Hebamme und di Papi hän immer so blöd grinst wo ich vom WC zrug ko bi. Sie hän mir erst nocher gseit dass sie alles ghört hän. Öbe am 17.00h hani denn beschlosse dass ich ä PDA möcht. D Hebamme het gseit dass sie mi vorher nomol möcht untersueche. Im nochhinein het sie mir gestande dass sie das nur gmacht het will sie d PDA nid het könne amelde willd Anästhesiste im Rapport gsi sin. Ich ha gseit sie ka scho untersueche, aber es isch eh deprimierend. Sie het denn gseit dass dr Muettermund fast vollständig eröffnet isch. Isch ha denkt sie verarscht mi! Ich ha denn beschlosse dass ich kei PDA möcht, will ich denkt ha es isch agnehmer wenni mi guet ka bewege fürd Ustribigsphase. Scho bald hani denn Pressdrang gha. Hät nie denkt dass mä das so guet spürt, aber es isch grad klar gsi, DAS sin Presswehe. Ich ha soo heiss gha und di Papi het mi super unterstützt und mi immer miteme kalte Wäschtiechli abgwäsche! Ich wär soo gern ind Maggia go bade, so heiss hani gha! Juna mis liebe Schätzeli, du bisch ä kleine Querschläger gsi und hesch dini Schultere eifach nid welle dreihe!!! BI jedere Wehe hani gspürt wie du abe gosch und indr Wehepause widr uffe! Das isch sooo deprimierend gsi! Es isch eifach nid recht vorwärts gange. Ich ha d Hebamme immer widr gfrogt wie lang dasses no got. Irgendwenn het sie hseit jetzt no 15 Minute mit Wehemittel und sunst gits ä Glocke. OU NEI, das willi uf kei Fall! Also hani nomol alles gä! Du hesch immer alles super mitgmacht! Irgendwenn isch denn d Ärztin ko und denn hani gwüsst dasses jetzt nüm lang got. Ich ha mir mega Mieh gä nid unkontrolliert z presse, willi ä Dammriss ha welle verhindere. Es het sooo fest weh to und brennt, aber irgendwie bini wie in Trance gsi. D Hebamme het gseit ich muess genau dört ane presse wos weh tuet- jo super! Plötzlich isch di Kopf do gsi, und schnell isch äu dr Körper ko. Das Gfühl wo du useko bisch isch eifach unbeschriblich!am 1.11.11 am 20.04h bisch du gebore liebi Juna! Obwohl ichs bis am Schluss nid glaubt ha hani grad gseh dass du ä Mäitli bisch! WOOOW! Di Papi het denn d Nabelschnur durchtrennt. Er het mir nocher no gseit dass er Angst gha het dassd Scher stumpf isch, aber er hets denn ohni Komplikatione gschafft...Du bisch denn zu mir ufd Brust ko, so warm und fiecht! Ich bi denn no zämägflickt worde und ich ha mi super gfühlt! No nie im Lebe bi ich so stolz gsi: Ich ha ä gsunds, wunderschöns mäiteli gebore, und das ohni jeglichi Schmerzmittel! Die Papi isch äu sehr stolz gsi uf uns und het ganz oft zu mir gseit: Danke dass du das für uns gmacht hesch! Das hani so schön gfunde! D Hebamme und d Ärztin hän gfrogt wie du heissisch. Mir hän gseit dass mirs no kurz mien bespreche. Hän uns denn aber gluegt und glache und beidi gnickt dasses eigentlich klar isch: JUNA Mathilda Beatrice! Mir hän denn alli informiert und di Opi und d Nonna sin di denn scho im Kreissaal ko bewundere. Di Papi het di gar nüm welle us de Händ gä! Ich bi denn go dusche, ha mi icremt, frisiert und Zähn putzt. Denn bini zrug ins Zimmer und ins früsche Spitalbett und ha di könne bewundere! Nach dere Duschi hani mi gfühl wie nacheme 2 wüchige Wellnessurlaub! Dä Moment mit dir isch dr schönsti imim Lebe gsi. Dr Usdruck „es isch ä Wunder“ het denn erst richtig Sinn gmacht und ich weiss jetzt wases bedütet, oder besser gseit ich spürs! D Hebamme het uns denn no ufd Wuchebettstation brocht, denn isch ihri Schicht grad verbi gsi! Liebsti Juna, ich wünscht ich könnt dä Tag vo dinere Geburt ine Gläsli tue und immer widr bitz drvo nä, wie vomene feine Kueche! Obwohl d Geburt sehr schmerzhaft gsi isch, schmerzhafter als ich mirs je hät könne vorstelle, ischs wunerwunderschön gsi, und mir hän so wahnsinnig viel Freud an dir! Übermorn bisch du scho 2 Mönet alt. Dis Lächle isch unbezahlbar und ich hoff di no ganz vili Joor z könne begleite und di ufwachse gseh! Mir hän di soo lieb!
Dis Mami
P.S.: Dis Geburtsdatum hesch dr super usgsuecht, so könne sichs di Opi und di Papi äu merke...
