Min liebe chline Luusbueb,
Jetzt bisch du scho 7mönet alt, machsch euses Glück perfekt und berricherisch euses Lebe ungemein.
Aber ganz vo vorne, am Samstig 11. Februar 2012 han i plötzli so e putzwuet becho und mi so komisch gfühlt, so das i eifach mal en Schwangerschaftstest gmacht han. Scho nach churzem isch e ganz liechti 2linie sichtbar worde, bin zerst grad chli verschrocke und bin din Papi go fröge was er da gseht, er hät die 2 linie natürli au gseh, und mer händ eus grad sehr über di gfreut.
2 wuche spöter händ mir scho chöne zum Frauearzt, de hät aber nur e Fruchthülle gseh, und hät uf e Eileiterschwangerschaft tippet, also hani all paar Tag müesse verbi gah. I han mir recht sorge gmacht um di, aber 3wuche spöter händ mir din Herzschlag gseh, und mir händ eus so wahnsinnig uf di gfreut.
Im Juni sind mir denn mit dim Brüeder id Ferie gfahre und uf em Weg händ mir en Name für die gsuecht, händ den au en Mäitli-name gfunde für die, sind eus sicher gsi das du es Maitli wirsch
. Paar Tag spöter bim grosse Ultraschall im Spital hät sich den aber ussegstellt das du en Bueb bisch, isch also echt ned überzsgseh gsi. Also händ mir eus wieder ufd Suechi nacheme Name gmacht.Paar Tag nach dim Brüeder sim Geburi, händ mir wieder bi eusem Frauearzt Termin zur Kontrolle gha, de hät den aber unbedingt müesse en Krebsabstrich mache ( werum au immer)! Dur das hani den plötzlich Bluetige becho und immer wieder en härte Buch. Wo's am nächste Tag nonig besser gange isch, sind mir is Spital gfahre, die händ den versuecht Bluetig zstoppe und händ es CTG gmacht, und das hät Wehe ufzeichnet, da aber de Gebärmuetterhals no gnueg lang gsi isch und dir super gange isch, hani wieder dörfe hei, ha eifach müesse liege und Medis neh.
Han den am Tag spöter dem Frauearzt aaglütet und en gfrögt weshalb er unbedingt hät müesse en Krebsabstrich mache und das ich jetzt Wehe häg weg ihm ( ussag vom Spital das mer so spat kein Krebsabstrich meh macht und das ich drum Wehe han) , er hät den befunde das das ned vo dem chömi und das ich eifach zviel znervös säg und drum Wehe häg. Han ihm den gseit das ich sletscht mal bi ihm gsi segi und han uufghänkt.
Dur die Wehe han ich den bis fast am schluss mich müesse schone, und han nüt meh dörfe lupfe. Han mir also recht sorge um dich gmacht, aber du häsch di guet festghebet.
De Zuckertest händ mir den au ned bestande und so händ mir ab em August müesse Messe und kurz druf abbe au müesse Insulin sprütze, aber für di han i das gern gmacht
Am 10 Oktober händ mir wieder mal müesse zur Kontrolle in Gebs, und da hät den Ärztin gfrögged werum mir immer no Schwanger segged, will eigentlich hättisch du weg em Schwangerschaftsdiabetes scho sitere Wuche sölle uf de Welt si, tja han ihre den gseit das bis jetzt all gseit häged das mir wartet. Tja da den Bluetzuckerwert trotz Insulin nümm so guet gsi sind und ich immer mal wieder unterzucker gha han, isch den entschide worde das mir am Dienstag 16. Oktober müend iirucke zum iileite. Also sind mir am Dienstag-abig am halbi 10 iigruckt zum iileite, nachdem mir no gmüetli mit dim Brüeder znacht gässe und gspielt händ, und in den bi de Schwiegis is Bett bracht händ.
Mir sind as CtG hänkt worde, händ es Plättli gleit becho und den is as Infusionesteche gange
D'Hebamme häts 2x probiert und hät dernebed gstoche, und da ich Infusione-legge echt ned gern han, hät sie die Diensthabendi Anestesistin bstellt. Die häts zwar au ned eifach gfunde aber bim erste mal grad gschafft, zum Glück.Din Papi hani den heigschickt zum schlafe, und da ich nöd gross Wehe gha han, isch din Papi am Morge no go schaffe.
Ctg hät ganz liecht Wehe uufzeichnet, und de Gebärmuetterhals isch am schrumpfe gsi und fingerdurchlässig, aber das is denn au gsi.
Will ich bi jedere Wehe ziemlich Schmerze gha han ( din Chof isch bi jedere Wehe uf mis Schambei troffe), händ din Papi und ich entschiede das es gschieder isch wenns dich per Kaiserschnitt holed, wills bi dim Brüeder genau so gloffe isch wie bi dir. Mir händ das den de Hebammene mitteilt, aber denn isch e Ärztin cho und hät befunde das mir doch zerst no sölled de Wehetropf versueche und denn chönntet mir immer no en Kaiserschnitt mache. Und will mir dir händ welle e normali Geburt ermögliche händ mir denn em Wehetropf zuegstumme. Nach 5 Stund Wehetropf, all 1-3 minute starke Wehe und Schmerze, händ mir entschiede das en sölled abhänke dermit ich mal chan schlafe und ja viellicht Wehe au so chömmed, will am ganze befund häts sich i all denne Stund nüt gänderet gha. Dir is aber die ganz ziit guet gange, nur ich bin völlig k.o gsi will i scho sit 2täg nümm gschlafe han. Nach vielne schmerze und keim schlaf, han ich am morge am 2enere Hebamme glütet, das ich gern öppis geg d'schmerze hät und das sie de Ärzt söll säge das dich am nächste Tag sölled holle ( hebamme hät das so zmittzt i de Nacht gar ned lustig gfunde, nur i bin so fix und foxi gsi das mir das egal gsi isch)
Din Papi hani no i de Nacht informiert, am nächste morge so geg die halbi 11 is denn in Op's gange.
Im Op' s händs denn gmerkt das de Zuegang kaputt isch und händ versuecht en neue zsteche, aber jedesmal wenn de zuegang drinn gsi isch häts d'Vene gjaggt. Zum glück häts den de chefarzt gschafft, bi de spinalanästesie händs wenigstens scho bim 1 mal troffe.
Denn is ganz schnell gange, din Papi häts sichs nebed eus gmüetlich gmacht und scho churz druff abbe, am 18.10.12 um 11:09 häsch du Quirin s'liecht vo dere welt erblickt und grad wie am spiess gschroe, und häsch erst wieder uufgörtt wos dich nach em erste Check bi mir ufd Brust gleit händ.Du bisch so chli und perfekt gsi, eifach nur goldig, euses chline Wunder. Will ich aber den problem gha han mit schnuffe und du bim Papi wieder ganz fest häsch müesse brüelle, bisch du mit em Papi und de Hebamme ufe in Gebärsaal und häsch dert uf mich gwartet und bisch scho mal warm aagleit worde.
Endli bi eu hand i dich in rueh chöne bewundere, mit dir schmüssele und du häs erst mal a de Brust gnuggeled, i han derbi eifach starchi schmerze im Buch gha, han mir aber nüt debi denkt.
2stund nach dinere Geburt hani müeh becho bim schnuffe, und nur minute spöter is ganz Zimmer voll gsi mit Ärzt und Hebamme, bluetdruck isch no bi 80/40 gsi, uf em Ultraschall isch aber nüt zgseh gsi, so dasd Ärzt vonere hypotone Phase gred händ, i han denn im Schuss Volume becho und e Atemmaske, so hani mi schnell wieder erholt gha und dich wieter chöne gnüsse.
1-2 stund spöter hani immer meh schmerze becho und immer wieder de Hebamme glüttet ( e lernendi händ mir gha), da si aber bim uf de Buch trucke unde nöd meh bluet hät ussecho gseh, hät sie immer gseit es seg ned so schlimm und en Kaiserschnittnarbe tüech halt weh etc... Wo ich denn aber starchi schmerze au i de Brust becho han wo bis id Schultere usgstrahlt händ und fast kei Luft meh becho han, hani nomal glütet, und da hät sie doch gmerkt das öppis ned stimmt, innert sekunde ischs Zimmer wieder voll gis mit Ärzt und Ultraschallgrät. Han leider bim Ultraschall au uf de Bildschirm glueged und öppis gseh winke ( hät uf all fäll so ussgseh), und denn hani all die entzetze Blick gseh, und Panik i de Stimm vo de Hebamme will si hät sölle Bluet ha fürs Labor! Denn häts gheisse, tüend sie sich bitte schnell verabschiede mir müend sofort in Op's! Uf em Weg in Op's sind Ärzt grennt mit mir im Bett und ich han eifach nur Brüelled will i ned gwüsst han ob i dich oder din Brüeder jemals wieder wird gseh. ( frürt mi au jetzt grad wieder bi dem Gedanke
)Im Op händs denn zerst wieder müesse neui Zuegäng lege da de alt scho wieder kaputt gsi isch, hät den halt eine im Hals geh.
Wo' s d Klammere entfernt händ vo de Naht hät unnde scho Bluet durredruckt und wo alles offe gsi isch händs es stark sprützends Gefäss vorgfunde. Wärend de Op isch den no e anderi naht uufgange und i han 2,5liter Bluet verlore und dur das einigi Transfusione brucht.
I de Nacht han i denn höch Fieber becho und Niere und de Darm händ nümm recht gschaffed. Bis am Samstig hani kei errinerigge meh, bin meh im Delirium gsi und recht schlimmi Alpträum gha, zum Glück isch aber de Papi bi eus im Spital bliebe und hät sich um dich kümmeret.
Au wenn ich no einigi Tag fast nüt han chöne mache, han ich dich doch wenigstens chöne im Arm ha und mir händ eus endli chöne beschnuppere und gnüsse.
Mir händ dur die Komplikatione denn doch chli länger müesse im spital bliebe und händ erst 9täg nach em Ks wieder dörfe hei gah, wo din Brüeder scho ungeduldig uf eus gwartet hät.
Mir sind knapp ä Wuche di heime gsi, da häsch du au scho müesse mitere Nierebeckeentzündig für 2 Wuche is Chispi, aber au das häsch du super gmeisteret. Nur leider muesch du weg dim Niere-reflux jetzt doch no lang Antibiotika neh, aber du zeigsch es allne und gedeihsch prächtig, ich bin so stolz uf dich min chline Kämpfer, mach wieter so.
Und jetzt bisch du scho 7 mönet bi eus, fangsch a chrabble und sit gester chasch du dich selber hiisetze, du wirsch so schnell gross min chline strahlende Luusbueb!
