Nach de 8te hani mou gluegt i wellne Abständ si chöme – aui 7-8 Minute – aber nid stark! So uf die 9i hets chlei afo azieh und si si stercher worde und i bi no unger d’Duschi. Sie si nid wäg gange.
I ha mou mini Täsche füre ghout und ha dr Ädu langsam gweckt. Ha im Spital aglütte und gseit mir chöme mou verbi – nid dass i de no im Outo plötzlich muess gebähre
D’Wehe si immer stercher worde und ha se scho chlei müesse verschnuufe. Mir hei no dr Räschte zämä packt und si ufe gfahre. Weheabständ i 5 Minute und am 9.50 Uhr si mer im Spitau gsi.D’Hebamme het üs grad ines Gebährzimmer begleitet und het mi ads CTG aghänkt. Jetzt hani d’Wehe scho rächt müesse verschnuufe und i bi ume gloffe und wenn eini isch cho hani mi ar Badwanne abgstützt. Dr Ädu het mer Druck gäge ds Chrüz gä damits besser ushautbar isch gsi. Am 10.45 isch si wieder cho kontrolliere und het mi ungersuecht – 6 cm offe!
Si het mi gfrogt öb i id Wanne wöugi – i ha gseit gärn und am 11ii bini dinne gsi. Ir Wanne si d’Wehe grad ähnlich starch worde wie denn bim Pheli woni id Wanne bi. D’Hebamme isch schnäu use – si het äuä dänkt das geitt no äs ziitli
Doch nach ca. 10 Minute vo dene megastarche Wehe hani gspürt wie d’Fruchtblase platzt und wie aues aberütscht!!! I ha so ne art Pressdrang gha und ha nid gwüsst darfi überhoupt scho presse und ha afo hächle – ha sofort dr Knopf drückt, dass d’Hebamme chunnt und dr Ädu het mir när gseit gha – är heigi dänkt – nei ämu nid scho jetzt oder? 
Sie isch ine cho und mini Ärztin isch per Zuefau ou grad ume gsi und isch ou i Gebährsaal cho. D’Hebamme het gseit i söu id Wanne hingere ligge – da i immer no uf aune vierne bi gsi ir Wanne zum d’Wehe besser ds erträge. Denn het si gseit i söu mini Chraft bi de Wehe jetzt abe drücke – i dörfi presse!
Woni ha afo presse hani gmerkt wies ir Scheide foht afo riisse. Nach 2-3 Wehe het si gseit i söu mou abelänge und ds Chöpfli gspüüre. I ha abeglängt und dr chlii Chopf mit de Hoor spüürt
Nach wiitere 4-5 Wehe hei si gseit i söu nümme presse und sie hei mir ds Zweute mis Becki dräit und d’Ärztin het mir mis Bei glüpft. Anschiinend het är mit de Schultere chlei müeh gha. D’Nabuschnuer het är ou no ume Hals gha und nach däm Dräie und umezerre isch dr chlii YARIN FILIP uf d’Wäut cho. Är isch chlei bläulich gsi aber är het grad afo chnorze und schreie.
I ha tatsächlich so nes überwältigendes Gfüeu gha und mir si d’Träne cho. I ha ne dörfe ufe Buuch ha und dr Ädu het d’Nabuschnuer düregschnitte! Ou dr Ädu het Träne i de Ouge gha und het gseit wie stouz är uf mi sigi…
Am 13.4.09 um 11.37 Uhr mit 3920g und 50cm isch üse chlii zweuti Sunneschiin uf d’Wäut cho.
Si hei dr Yarin när warm ipackt am Ädu uf d’Bruscht gä. D’Hebamme het gseit i söui nomou presse damit d’Plazenta ou no cha usecho und si isch de ou grad cho. I ha wieder d’s Beischlottere bercho wie bim Phelan – si hei jo ds warme wasser um mi ume use gloh gha nach äm abnable.
Nach äm abspüele het si mer useghoufe und ufs Bett begleitet. När hei si mer dr Chlii wieder uf d’Bruscht gä. D’Ärztin het mini scheideriss und Dammriss gnäit – wie bim erschte mou hets ou dieses mou grisse.
Obwous schnäu gange isch und am schluss ou rächt heftig isch gsi, bini doch nid so Hormongflashet gsi wie bim Phelan woni 2h so starchi wehe ir wanne ha müesse erträge! Im gsammte ä viu positiveri Geburt für mi, villicht wüu i ou gwüsst ha wies ablouft und dass i mi ufne evtl. schnäui Geburt ha chönne isteue! Am 10i im Spitau und am 11.37 bisch scho do gsi!!!
Im Nachhinein ä Troumgeburt
aber ä chlini hoffnig han ich schon no.